Latest News

Health Minister in Hnahthial-a sawrkar hotute a kawm

Health Minister leh South Tuipui bialtu MLA, Dr. R. Lalthang-liana chuan nimin khan Hnahthial tlawhin Hnahthial District-a sawrkar Pisa hrang hrang enkawltute a kawm.

Hnahthial DC's Conference Hall-a inkawmhona ah hian Health Minister, Dr. R. Lalthangliana chuan Hnahthial District thar puan a nih hnu lawkah beisei loh deuhin COVID-19 boruakin min tuam avangin Hnahthial District-a sawrkar Pisa hrang hrang dinhmun hrechiang tura inkawmhona an nei remchang thei lawk lo chu pawi a tih thu sawiin, boruak a ziaawm tak deuh hnu ah remchang dapin hun tha tak an nei chu lawmawm a tih thu a sawi a ni.

Health Minister chuan COVID-19 dona kawngah Hnahthial District hmalakna chu chhuanawm a tih thu sawiin, Hnahthial mai bakah Mizoram chu mipuite leh tlawmngai pawlte bakah Kohhran hruaitute, khawtlang hruaitute leh sawrkar thawhhona a that avang leh Pathian zahngaihna avangin India rama he hripui tuar nep ber State kan ni hial mai chu a ropui a, kan zavaia kan thawhrah liau liau a ni, a ti a. Thla thar atangin Sakhaw biakna hmuna inkhawm phal a ni tawh dawn tih sawiin, hei bakah hian zirna In zawng zawng a pawl hniam ber atanga a pawl sang ber thlenga hawng turin ngaihtuahna sen mek a ni bawk tih a sawi a, heng hunah te hian mipuiten kan zawm tur leh kan tih ve tur a awm a ni tih hre renga thuawih taka kan awm zel chu kan himna tur a ni tih hriain sawrkar zai ngai chunga awm zel a pawimawh thu a sawi bawk.

He inkawmhonaah hian sawrkar pisa hotuten an hmalakna leh an hlawhtlinna te bakah District Office puitling anga kal tura an mamawh leh hmachhawp chi hrang hrangte an sawi a, Minister chuan a theihna ang chin chinah lo bawhzui a tum thu a sawi a ni.

Comments

Chhiar Hlawhte