Latest News

Govt. Serchhip College-ah ‘Road Safety Month’ hawnna Addl. SP hovin neih a ni

India rampum-a ‘Road Safety Month’ hman mek denchhenin nimin khan Govt. Serchhip College NSS Unit te chuan ‘Sadak Suraksha - Jeevan Raksha’ tih thupui hmangin ‘Road Safety Month’ hawnna an nei a, Serchhip District Addl. SP, PC. Laltanpuia chuan khuallian niin a hmanpui a ni.

Ministry of Road, Transport & Highway chuan ramchhunga NSS Unit leh NCC te chu ‘Road Safety Month’ hmang tur hian ngenna siamin hemi ang hian Govt. Serchhip College-ah pawh he hun hi hman a ni a, he hunah hian Addl. SP, PC. Laltanpuia chuan Road Safety Month thupui Mizo tawng-a lehlin chu ‘Fimkhur la, nunna chhanhim rawh’ tih anih angin fimkhur hmasak phawt chu nunna chhanhimna a nih thu a sawi a, Serchhip-ah lirthei chetsual avanga nunna chan kum 2019 atanga kumin thlengin mi 6 an awm thu sawiin, fimkhur loh avanga chetsualna dang aiin lirthei chetsual avanga nunna chan chu a tam ber an ni tih a sawi a. COVID-19 hri a len hnuah Serchhip-ah nikum khan lirthei chetsual avanga nunna chan chu hri avanga nunna chan aiin an tam tih sawiin, lirthei a chetsualna thleng thin chu fimkhur chuan kawng engemaw chenah a inven theih tih a sawi bawk.

Khuallian chuan India ram-ah minute 4 danah mi pakhat zelin lirthei avanga nunna an chan anga chhut ani tih sawiin, hei hian kiam lam a pan theihloh avangin Road Safety Week pawh ‘Month’ anga thlak a ni ta tih a sawi a, lirthei khalhtuten an zawm tura Dan siam chu kan him nan zawm mai hi a tha a ni, a ti a. Dan an siamte chu zawm har tur a awmlo tih sawiin, lirthei a chetsualna chuan nunna a la lo anih pawhin ramtuileilo-a awm theihna leh tul lova sum tam tak senna ani avangin rilru puthmang kan thlak a, tun aia Dan zawm that lamah hma sawn lehzual a ngai a ni, a ti a, lirthei khalhtute chauh nilo, kawngpui hmangtute zawng zawngin heng dan te hi an zawm vek a tul thu a sawi bawk.

Road Safety Month hmanna hun Smart Class Room-a neih hi C. Lalramliana Programe Officer, Govt. Serchhip NSS Unit chuan a kaihruai a, Dr. S. Beihrosa, Programme Officer, NSS leh Judithi Laltanpuii, V-Sem B.Sc ten kalkhawmte hnenah zirtirna pein, Dr. Lalhmangaihzuali Ralte, Programe Officer NSS kaihhruaina in College zirlaite hian Lamlian-a fimkhurna tur leh lirthei khalh fimkhurna tur a intiamna (Pledge) an sawi rual bawk.

Comments

Chhiar Hlawhte