Latest News

Chanchin thar thenkhat :

IG (AR) in Larsap a kawm

Assam Rifles (East)-a Inspector General, Major General Ranjit Singh, VSM chuan Inrinni khan Mizoram Governor, P.S Sreedharan Pillai chu Aizawl-a Raj Bhavan-ah kawmin Larsap chuan Mizoram mipui leh a bikin thingtlang lamah te khawtual mite hmasawnna atan Assam Rifles in hna tha tak an thawk tih a hriat thu leh lawmawm a tih thu a lo hrilh a. Assam Rifles te chu 'Tlang mite Thian' an nih anga hna tha thawk chhunzawm turin a sawm bawk. Major General Ranjit Singh chuan Assam Rifles ten an awmna hmunah te a theih anga khawtual mite tan theihtawp an chhuah thu leh ram venhim hna pawh tha taka an thawh thu a sawi a. An hnathawh te Governor in a lo hriatpui avanga lawm awm a tih thu a sawi a. Kawng tha zawk leh inbiakpawhna tha zawk te Mizoram hmun kilkhawr zawkah chuan siam a ngai nia a hriat thu te a sawi a. Thingtlang mite eizawnna loneih leh huan siam kawnga thil tul nia a hmuh te pawh Governor hi a hrilh a. Heng bakah hian ram venhimna chungchang leh thil pawimawh dang te an sawidun bawk a ni.


Hospital sakna tur lung phum

Cheng nuai 17.93 seng-a khum 10 awmna Mamit District Hospital Building sakna tur lung-phum chu Inrinni khan Health Minister, Dr. R. Lalthangliana chuan a phum. Power Finance Corporation Ltd. chuan he Hospital sakna atana sum ngai zat atanga zaa 70, cheng vbc. 12.55 chu CSR atangin an ruahman dawn a, a bak chu State sawrkar-in a tum ve thung dawn a ni. Hospital Building hi cheng vbc. 16.93 senga sak tura ruahman a ni a, cheng vbc. 1 dang chu hmanraw leina atana ruahman niin Zamzo Engineering, Construction & Consultancy in a sak hna an thawk anga, thla 24 chhunga zawh hman tur a ni ang.


LADC sawrkar lalut dawn

Lai Autonomous District Council-a MNF sawrkar, Manghmunga Chinzah kaihhruai chu Vawiin, December ni 14, 2020 (Thawhtanni) hian rinawmna thu tiam tira lakluh a ni dawn.


SOP palzut-ah sawrkar puh

Mizoram Pradesh Congress Committee chuan Dec. 10, 2020-a Kawrthah, Tuidam leh Mamit-a Pradhan Mantri Jan Vikas Karyakram (PMJVK) sum hmanga sports tihchangtlunna tur lungphum Chief Minister leh Sports Minister in an phumna ah hri leng vanga sawrkar in Standard Operating Procedure (SOP) a siam palzutin mipui punkhawmna huaihawt a ni tih sawiin, MNF sawrkar chu mipui himna ngai pawimawh lo-ah an puh bawk.


Mipui ten hriat an phu - ZPM

ZPM Thalaite chuan Saihapui 'V' leh Phai-nuam inkar kawng metre 750 siamna atan cheng nuai 16 pekchhuah a ni tih sawiin, amaherawh chu kawng metre 402 chiah siam a ni thung tih an sawi a. Kawng siam chin tura ruahman metre 750 a tlinlohna chu metre 348 lai a ni tih sawiin, kawng metre 348 siamna tur sum chu khawiah nge a luan ral tih chu mipui ten hriat an phu thu an tarlang bawk.


Mizoram Synod Inkhawmpui zawhfel a ni

Mizoram Kohhran lian ber, Presbyterian rorelna sang Synod inkhawmpui vawi 97-na chu Zirtawpni khan a tiak a, nakum Synod inkhawmpui chu December ni 1-12, 2021 chhungin Republic Veng Kohhran Biak In-ah neih a ni ang. Synod inkhawmpui hian Mizoram chhungah Pastor bial thar 8 hawn an remti a, thurel langsar zingah COVID-19 hripui leng vanga Tam lo thleng thei laka ruahmanna Synod-in siam tura rawtna chu SEC bawhzui tura dah a ni a. Kohhran Pavalai Pawl din tan ni ah July ni 21, 2004 chu pawmin kum 2021-2022 budget atan Rs. 3,79, 20,14,000/- chu pawm a ni bawk.

Comments

Chhiar Hlawhte