Gas semtu ten a man to-a Gas an hralh man a ni

Inrinni khan New Serchhip-a eirawngbawlna Gas sem niin mi tam tak ten an chanloh laiin Gas semtu ten a man to-a a hralh chu man niin heng an Gas hralh te hi laklet leh a ni.

Serchhip District Consumers Association hruaitute hnen atanga thu kan dawn danin Inrinni kalta, Nov. 14, 2020 khan New Serchhip College peng-ah MIZO-FED chuan eirawngbawlna Gas an sem a, Gas mamawh intlar zingah chang lo tam tak an awm laiin MIZOFED atanga Gas semtu mi panga (5) te chuan New Serchhip Venglai YMA Hall ep-a dawr pakhatah bur 10 chu a man to in an hralh tih hriatchhuah a ni a, Serchhip District Consumer Association, New Serchhip Venglai Branch YMA leh Legal Metrology Department ten hma la nghalin Gas semtu te hi Legal Metrology kutah action la tura thlen nghal an ni a, an Gas hralhruk bur 10 hi laklet sak a ni bawk.

He Gas hralhruk lai lo hmu a, Video a thla lo la tu New Serchhip Venglai Branch YMA hruaitute chuan Gas semtu hi an thiltih dan zawtfiahin Gas semtute chuan, 'Hei chu kan share ve a ni,' an lo ti tih thu an sawi tih District Consumer Association te chuan sawiin, eirawng-bawlna Gas hi mitin chanvo tur a ni a, Gas semtu te hian Mizofed ten semna tura an ruahmana an sem bak thuneihna an neih loh thu leh Gas semtu tumahin share an neih ngawt theihloh thu an sawi thung a ni.

Hetianga eirawngbawlna Gas lo hralhtu MIZOFED Serchhip Branch-a Gas semtu mi 5 te hi Pathianni tlai khan New Serchhip YMA Hall-ah kohkhawm niin YMA leh Consumer hruaituten ten an zilh a. Consumer leh YMA te chuan eirawngbawlna Gas chu mitin mamawh anih avangin lo chheprelh emaw, dan kalha lo khawih chingpen emaw anih chuan an ngaimawh hle dawn tih an sawi a, tunhnuah pawh eirawng-bawlna Gas sem chungchangah dan pela thiltih a awm leh awmloh an enzui zel dawn thu an sawi bawk.