Electoral Roll siamthat hna thawh tan niin siamthat ngaite tan dilna hun hawn mek a ni

Nakum January ni 1-a kum 18 tling chin te laa Electoral Roll siamthat hna thawh tur atan nimin khan Serchhip District-ah Draft Electoral Roll tarchhuah a ni a, Draft Electoral Roll tarchhuah a nih rualin hian hming thun thar, paih ngai, siamthat ngai leh insawn duh te tan dilna thehluhna hun hawn nghal a ni.

Serchhip District-a Draft Electoral Roll tlangzarhna hi nimin khan Serchhip DC Meeting Hall-ah neih niin he hunah hian District Election Officer, Kumar Abhishek chuan Election Commission of India ruahmanna angin nakum January ni 1-a kum 18 tling chinte Electoral Roll a thun beihpui thlak neih chhunzawm tur a nih thu sawiin, he Electoral Roll Special Summary Revision hi hlawhtling taka kan neih theih nan tlawmngai pawl te, Political Party te, chanchinbumite leh khawtlang hruaitute thawhpuiah a sawm a. Bawrhsap hian Draft Roll dinhmun tlangpui a sawi bakah New Serchhip huam chhungah Polling Station thar pahnih 26/23 New Serchhip-I, Polling Station atan New Serchhip North Branch YMA Hall leh 26/26 New Serchhip-IV, Polling Station atan Brilliant HSS te siam thar an nih thu a tarlang a. New Serchhip-I BLO atan Peter Lalnunmawia leh New Serchhip-IV BLO atan R. Vanlalhuma ruat an nih thu a tarlang bawk.

He hunah hian Serchhip SDO (Sadar), C. Lalduhzuali chuan Draft Roll tarchhuah taka Serchhip District dinhmun tlangpui tarlangin, Serchhip District-ah hian Assembly Constituency pathum (3) awmin Polling Station 83 a awm a, Serchhip District pumah Vote nei thei mipa 25,092 leh hmeichhia 25,878; an vaiin vote nei thei 50,970 an awm a ni. Assembly bial hrang hrang zinga Vote nei thei tamna ber Serchhip bial-ah Polling Station 29 awmin Vote nei thei mipa 8816 leh hmeichhia 9814 awmin vote nei thei hi 18,630 an awm a, 27-Tuikum Assembly Constituency-ah Polling Station 29 bawk awmin vote nei thei mipa 7957 leh hmeichhia 8061, an vaiin vote nei thei 16,018 an awm bawk a, 28-Hrangturzo Assembly Constituency-ah Polling Station 25 awmin vote nei thei mipa 7924 leh hmeichhia 8001, an vaiin 15,925 an awm bawk a, Serchhip bial-ah Service Voters 186 awmin Tuikum bial-ah 118 leh Hrangturzo bial-ah 93, an vaiin Service Voters 397 a awm bawk a ni.

Hei bakah hian Serchhip District chu Census 2011 report ah Sex Ratio 981 a nih lain Voters-ah Sex Ratio erawh 1048 a ni thung tih SDO (Sadar) chuan sawiin, hei hi hmeichhia te an pasal neih hnuah a hmaa an awmna leh an pasal neihna hmunah Electoral Roll-a an awm nawn vang a ni ve palh thei tih a sawi a. Nasa taka Electoral Roll hi endik chhoh zel a nih thu sawiin, nikum Summary Revision chhung pawh khan lakluh belh aiin paih hi 31 zetin a tam zawk a ni, tiin nikum hmalak dan a tarlang bawk.

Hei bakah hian Revision neih mekah AERO ten an bial chhung khua ah Hearing an va neih ngei a tul chang a awm tih pawh sawiin, Hearing neia khua an va tlawh kher a tul loh chang te pawh a awm ve thei tih hriatpui turin kalkhawm te hi a ngen bawk a ni.

Nimin-a Draft Electoral Roll tarchhuah a nih rual hian Electoral Roll-a hming thunluh, paih ngai leh siamthat ngai te tan dilna hun hawn nghal a ni a, hetiang duh te tan hian December 15, 2020 thleng mahni awmna bial BLO te hnenah dilna thehluh theih a ni anga, hemi hun chhung hian Special Campaign pawh neih tur a ni ang. Dilna te chu kumthar January 10 ralhma in chinfel vek an ni anga, January 14, 2021 hmain lehkha chinfel ngai chi reng reng chinfel niin ECI hnen atanga Final Publication neih phalna lak fel hman tum a ni anga, nakum January 20-ah Electoral Roll thar chu tlangzarh tur a ni ang.

Nimin a he hun hmanna ah hian Electoral Roll hi Political Party te hnenah semchhuah nghal a ni bawk.