Governor kutchhuak lehkhabu tlangzarh

Mizoram Larsap, P.S. Sreedharan Pillai-a'n COVID-19 inkhar-khip laia lehkhabu a ziah hrang hrangte tlangzarhna leh chhawpchhuahna hun Inrinni khan Raj Bhavan Durbar Hall-ah buatsaih a ni a, he hun hi Chief Minister, Zoramthanga chuan khuallian niin a hmanpui a ni.

Mizoram Larsap kutchhuak lehkhabu tlangzarhna hunah hian Chief Minister, Zoramthanga chuan Mizoram Governor P.S. Sreedharan Pillai chu dan hre mi a nihna leh mipui rawngbawl hna a thawhna bakah ziakmi ropui tak, lehkhabu 100 chuang sulhnu lo nei tawh a ni chu ngaihsanawm a tih thu a sawi a. Mi pangngai tan thu ziak leh hlaphuah a harsatzia a hriat thu sawiin, Governor erawh chuan hun reilote chhungin kutchhuak heti zat a nei tawh tih han hriat hian mi bik a nih zia a lantir thu a sawi a ni.

Lehkhabu tlangzarhna hunah hian Chief Minister hlui, Lal Than-hawla pawhin thu sawiin, lockdown hun tangkai taka hmang a lehkhabu tam tak Governor in a ziak hman chu ropui a tih thu a sawi a. Sap tawng-a Mizoram chanchin ziakna lehkhabu awm zat chu duh thu a la samlo hle tih sawiin, chutihlai kara kan Governor in Mizoram chanchin thu leh hla tha tak tak a ziak chu entawntlak a tih thu a sawi a. Mizoram chanchin leh Mizo te chanchin tam zawka ziak zel turin duhsakna a hlan a ni.

He inkhawmah hian Governor P.S. Sreedharan Pillai kutchhuak thu leh hla lehkhabu 13 chu Chief Minister chuan a chhawpchhuah sak a. Heng lehkhabu te hi hmun hrang hrangah a tahtawl a tlangzarh tur a ni a. Lehkhabu pakhat ‘Corona Kavithakal’, COVID-19 chungchanga hla thu a phuah, Malayalam tawng-a ziak chu Chief Minister hian a tlangzarh sak nghal a ni. Gauhati High Court Chief Justice, Justice Ajai Lamba chuan 'Republic Day 2020' leh 'Thus Speaks the Governor' tih chu Guwahati atangin Video kaltlangin a rawn tlangzarh sak bawk a ni.

Comments

Chhiar Hlawhte