Chanchin thar thenkhat :

Hri kai hmuh 400 tling ta

Mizoram-ah COVID-19 hri kai mi 11 hmuh-chhuah leh niin Mizoram-a hri kai hmuhchhuah chu mi 400 an tling ta. Niminpiah khan ZMC Laboratory-ah Swab Sample 238 enfiah niin heng atang hian COVID-19 hri kai mi 9 hmuh-chhuah niin an vai hian Aizawl District mi leh sa vek niin mipa 6 leh hmeichhia 3 an ni a, puitling kum 20-45 inkar bakah naupang kum 4 leh 13 mi te niin an vai hian State pawn atanga rawn haw leh quarantine lai vek an ni a, hei bakah hian Rapid Antigen Test hmangin hri kai pakhat hmuh-chhuah ni bawkin ani hi hmeichhia a ni thung. Nimin khan hri enkawl dam mi 13 an awm leh bawk a, heti hian Mizoram-ah hri kai hmuhchhuah mi 408 atangin mi 247 enkawl dam an ni tawh a, mi 161 enkawl mek niin State pawna thawn-chhuah mi pakhat a awm bawk a ni.

Green-Ag: GLIU hawng

Agriculture Minister, C. Lalrinsanga chuan Agriculture Department hmalakna thar, United Nations Food and Agriculture Organization (FAO) hnuaia ‘Green-Ag : Green Landscape Implementation Unit (GLIU)’ chu nimin khan Lunglei ah a hawng a, he project hnuaiah hian Agriculture Department hmalaknate chu ramngaw leh nungchate humhalh chunga kalpui anih tur thu Minister chuan sawiin, he Project hi Lunglei District chhunga Thorangtlang Wildlife Sanctuary leh Mamit District huamchhunga Dampa Tiger Reserve-te chhehvel khaw 30-ah bultan tum niin khaw dang pawh telh belh zel tum an nih thu a sawi bawk. He project hi kum 6 (April 1, 2019 atanga March 31, 2020) chhung atana ruahman niin Project kalpui tur hian State thlanchhuah panga (5) te Budget intawm chu US Dollar 33,558,716 nia chhut a ni.

Admission Fee harsa te tanpuina tur sum hlan

Aizawl North-II bialtu MLA, Dr. Vanlal-thlana chuan nimin khan a bial chhunga College pahnih-a Admission Fee pe theilote tanpuina tur leh College-in a mamawh lehkhabu leina atana MLA Fund atangin pawisafai a pe. Dr. Vanlal-thlana MLA hian amah pawh College Zirtirtu a nihna atangin College Admission tih laiin zirlai harsa tak tak ten Admission an tih theih nan zirtirtuten an lo tanpui thin thu sawiin, COVID-19 hripui lengin mi tam tak eizawnna ah harsatna a siam avangin a bial chhunga awm College pahnih ah pawh chutianga tanpui ngai chu kumdang aia an tam a rin thu a sawi a. Admission Fee pe theilo te tanpuina tur leh College-in a mamawh lehkhabu leina atana hman turin Govt. Zirtiri Residential Science College hnenah Rs. 1,00,000/- leh Govt. Aizawl North College hnenah Rs. 50,000/- a hlan a, heng sum te hi College Principal te'n an lo dawng a ni.

Quarantine senso mahni a intum tir a mak - BD. Chakma

BJP MLA, Dr. BD. Chakma chuan Mizoram Sawrkarin Quarantine Centre-a awm te mahni ei leh in man leh Swap Sample Test-a senso te mahni a intum a ti chu mak a tih thu a sawi. BJP Mizoram Pradesh in nimin-a Aizawl-a an Office-a Political Session an buatsaih ah Mizoram Pradesh BJP Vice President ni bawk, Dr. BD. Chakma chuan Mizoram Sawrkar hnathawk te leh mimal thahnem ngai ten CM Relief Fund atan sum tam tak an thawh lai a Quarantine Centre a awm te ei leh in man leh Swab Sample Test-na senso anmahni intum tura an ti chu a vanduai-thlak hle a ni, a ti a. “Mizoram Sawrkar hian COVID-19 dona tur atan sum tam tak a dawn te hi a hmanna felhlel a awm hial mai lo maw tih chu ka zawhna a ni,” a ti bawk. Dr. BD. Chakma chuan Central Scheme hrang hrang te MNF kaih-hruai Sawrkar hian Party bil induhsak nan a an hmang thin chu pawi a tih thu a sawi bawk.

CS hovin thutkhawm nei

Nimin khan Samagra Shiksha Executive Committee Meeting chu Chief Secretary, Lalnunmawia Chuaungo hovin New Secretariat Conference Hall-ah an thukhawm a, he hunah hian Samagra Shiksha hmalakna leh kalphung te thlirho niin Mizoram School Education Mission Society Regulation 2019 chu an pawmpui a, District Education Committee Constitution te, Mizoram School Education Mission Society Financial Regulation 2020 te, Audited Statement 2018-19 te, Annual Report 2018-19 te, Non-Teaching staff te hlawh tur rawtna te an pawm bawk. Samagra Shiksha hian Primary atanga Teacher Education thleng a huam a ni.

Lok Sabha MP in Muthi tlawh

Lok Sabha MP, C. Lalrosanga chuan SAGY hnuaia Model Village tura a thlan te zing ami, Muthi khua chu nimin khan tlawhin khawtlang hruaitute leh tlawmngai pawl hruaitute nen inkawmna an nei a. Lok Sabha MP chuan hripui leng mek avangin kumhnih chhung atan MP Fund hren a nih tak thu leh hei vang hian MP Fund atanga hnathawh tur ruahman a harsat rih thu a sawi a. Chutih rual erawh chuan Central sawrkar Scheme hrang hrang leh State Sawrkar hnuaia Scheme-te tangkai taka hmang thei tura ruahmanna mumal tak siam a pawimawh thu leh Chief Minister bial an nih avanga an vanneihna te chhawr thiam a pawimawh thu a sawi bawk.

Tuirial bialtu in PPE Set hlan

Tuirial bialtu MLA, Andrew H. Thangliana chuan a bial fang mekin nimin khan Bukpui PHC tlawhin PPE full set leh Face shield a pek bakah Tui Connnection lakna tur a ruahman sak bawk.