Latest News

Vaccine pe chhunzawm dawn

 Serchhip District chhunga Health Care Workers te hnena COVID-19 Vaccine, Covishield pek hna thawh mek chu Inrinni leh Pathianni te chawlh anih hnuah Vawiin hian Vaccine pekna tura ruahman hmun thum-ah pek chhunzawm a ni leh dawn a, thudawn danin Serchhip District chhunga mi 450 te hri danna pek turah ni 2 chhung khan mi 306 te chu hri danna hi pek hman an ni a, Presbyterian English School leh Midland M/S-ah mi 121 ve ve te hri danna pek ni tawhin Thenzawl CHC-ah mi 64 te hnenah hri danna hipek an ni tawh bawk a ni.

Sample 53 thawn leh

Nimin khan Serchhip atangin ZMC Laboratory-a enfiah turin Swab Sample 53 thawn a ni a, nizan lam khan result hi hriat hman beisei a ni.
Serchhip-a Health Department-a thawktute chuan tunhnai khan Serchhip District chhunga Quarantine mek te Sample lak chhunzawm lehin Sample an lak zawng zawng 53 te chu nimin khan ZMC Laboratory-ah enfiah turin an thawh a, heng zingah hian tunhnaia State pawn atanga rawn haw BSF te Sample lak pawh a tel a, heng Sample te hi nimin khan enfiah nghalin result pawh hriat nghal theih beisei a ni.
Hetihlai hian Serchhip Tourist Lodge-a inkhunghrang mek mi 4 te chu nimin khan inkhunghranna hmun atang hian chhuahtir niin mi 2 te inkhunghranna hmunah dahluh thar an ni thung a, heng mite nen hian tun dinhmunah Serchhip District-ah inkhunghrang mi 125 an awm mek a, heng te hi mahni In lama inkhunghrang mi 66 leh sawrkar hmunhma a inkhunghrang mi 59 te an ni. Sawrkar hmunhmaa inkhunghrang mek te hi Tourist Lodge-ah mi 11, P&E Rest House-ah mi 4, Agriculture Rest House-ah mi 2, Eklavya Model Residential School-ah mi 29, Sainik School, Chhingchhip-ah mi 8 leh Tourist Lodge, Thenzawl-ah mi 5 te an ni.

Comments

Chhiar Hlawhte