Inkhunghranna hun hmang zo mi 95 an chhuak

Serchhip District chhung inkhunghranna hmun hrang hranga inkhunghrang mi 95 te chuan an inkhunghran hun hmang zovin nimin khan chhuah tir an ni.

Nimin a inkhunghran hun hmang zo te hi a tam ber chu Vantlang hmun leh Kohhran hmun a inkhunghrang te niin Serchhip Kawnpui Kohhran Hall, Marian High School leh BCM New Serchhip Hall-a inkhunghrang mi 90 te chu RAT hmanga an dinhmun enfiah an nih hnu ah chhuah tir an ni a, hei bakah hian Tourist Lodge-a inkhunghrang mi 3 leh mahni In lama inkhunghrang mi 2 te pawh RAT hmanga an din-hmun enfiah a nih hnuah inkhunghranna atang hian chhuahtir an ni bawk.

Heng bakah hian nimin vek khan Ek-lavya Model Residential School-a inkhunghrang leh BCM Serchhip Hall-a inkhunghrang bakah North Vanlaiphai-a inkhunghrangte chu RAT hmanga an dinhmun enfiah niin Vawiin hian an inkhunghranna hmun atanga chhuak thei tura beisei an ni bawk a. Tunhnai khan sawrkar chuan thuchhuah siamin Quarantine Period chu ni 21 a nih thu leh ni 14 an inkhunghran hnuah PCR result a negative chuan Quarantine Facilities hi chhuahsan phal a nih thu a tarlang a ni.

Tun dinhmunah Serchhip District chhunga inkhunghranna hmun hrang hranga inkhunghrang mi 264 an awm mek a, heng te hi In lama inkhunghrang mi 30, sawrkar hmunhmaa inkhunghrang mi 183, Vantlang leh Kohhran hmunhma a inkhung-hrang mi 44 leh Isolation-a dah mi 7 te an ni.