Chhiahtlang VC ten an thla thum lawmman an hlan

Chhiahtlang Village Council Member leh Secretary te chuan an thla thum (3) lawmman te COVID-19 avanga ramri-a Duty te tanpuina atan nimin khan Serchhip Sub-Hqrs. YMA kutah an hlan.

Chhiahtlang VC ten an thla thum lawmman Serchhip Sub-Hqrs. YMA kuta an hlanna pual hian nimin chhun khan Serchhip Sub-Hqrs. YMA Office-a OB Room-ah inkhawm tawi neih niin he hunah hian Chhiahtlang VC Vice President, Khuanghnuna chuan hri leng laka Mizoram kan him theih nan mi tlawmngai tam tak Thosi leh Vangvat kar-ah ramri veng turin an riak tih an hriat thu sawiin, amaherawh chu VC in sum hranpa an neih loh avangin tunhnaia VC lawmman thla thum (3) chhung an lak chu, heng ramri-a Duty te tan hian an VC Sitting chuan hlan a rel angin an VC mi 6 te bakah Secretary te chuan an thla thum lawmman, a vaiin Rs. 14,400/- chu an hlan ta tih a sawi a. Serchhip Sub-Hqrs. YMA in an huamchhunga ramri-a Duty te chauh ni lo, Mizoram chhung hmundang a Duty te thilpek a lo pe te chu lawmawm an tih thu a sawi bawk.

Chhiahtlang VC te sumfai hlan hi Serchhip Sub-Hqrs. YMA President, R. Sanghmingthanga leh Secretary, Lalrammawia te chuan lo dawngsawngin, Serchhip Sub-Hqrs. YMA President, R. Sanghming-thanga chuan mi inphal te zarah ramri-a Duty te tan hian sum leh pai tam tham tak an dawn tawh thu a sawi a. Heng atang hian Mamit Sub-Hqrs. YMA hnenah Rs. 1,09,281/-; Kolasib Sub-Hqrs. YMA hnenah cheng nuai khat (1) leh Tuichangral South Group YMA hnenah Rs. 30,000/- hlan tawhin tuna sum an la kawl mek atangin Champhai Sub-Hqrs. YMA kutah cheng nuai khat (1) chu Vawiin hian an hlan leh dawn tih a sawi bawk a. Ramri-a Duty te tana sum leh pai lo thawh tawhtu te zawng zawng chungah Serchhip Sub-Hqrs. YMA chu a lawm hle tih a sawi bawk.