Buhfai-ah harsatna a awm rihlo; Local Task Force ten chhungkaw 350 chuang tanpui tawh

Tunlaia hri leng avangin inkharkhipna hun hman mek ni mah se Serchhip mipuite chuan ei leh bar-ah harsatna lian lutuk an la tawklo niin a lang a, Local Level Task Force te kaltlangin chhungkaw 350 chuang hnenah tanpuina thilpek hlan a ni tawh bawk.

Khawvel in a buaipui mek Coronavirus/COVID-19 darh zel tur venna atan hian sawrkar laipui chuan March 25, 2020 atang khan ni 21 chhung awh turin Total Lockdown a kalpui a, hemi atang hian mipuite chu ei leh bar dap turin pawn-ah an chhuak hleithei tawh lo a, khawpui chhunga Local Level Task Force te chuan an huamchhung theuh ah chhuanchham-a awm thei te tanpuina hna thawkin tun thlengin harsatna liantham a thlen hriat a ni lo a. Hei bakah hian Mizoram sawrkar chuan mipui ten buhfai-a harsatna an tawhlohna turin mi harsa zawkte hnenah a thlawnin buhfai a semchhuak bawk a, heng bakah hian Retailer kaltlanga Ration buhfai hi pekchhuah a nih bawk avangin tun thlengin mipuite hian buhfai chungchangah chuan harsatna an la tawklo niin a lang.

Khawpui chhunga Local Level Task Force te hian an huamchhung theuhah a remchan dan ang zelin mipuite hnenah ei leh bar tur hi semin Serchhip-I (Vengchung) huamchhungah chhungkaw 8 hnenah Buhfai leh chawhmeh sem tawhin miharsa zualte tan Buhfai leh Alu chhekkhawl a ni bawk a, Serchhip-II huamchhungah Dinthar area-ah chhungkaw 9 te chu Buhfai sem ni tawhin, Darnam leh Sailiam-ah chhungkaw 19 te hnenah buhfai sem tura ruahman niin chawhmeh tur hi sem a ni tawh bawk a. Serchhip-III (Chhim Veng) huamchhunga chhungkaw 6 te chu buhfai kg. 5 , Bawkbawn leh Alu kg. 2 theuh sem a ni tawh a, Serchhip-IV (Bazar) huamchhung ah a thawhkhat nan chhungkaw 25 tan Tel leh chawhmeh sem ni tawhin Serchhip-V (Field Veng) huam-chhunga chhungkaw harsa in report 17 zingah chhungkaw 14 hnenah Buhfai sem a ni tawh bawk.

Serchhip-VI (Hmar Veng) huamchhungah chhungkaw 56 velah Buhfai leh chawhmeh sem ni tawhin a mamawhte lak theih tura Buhfai dah chu chhungkaw 20 velin an la tawh . Ser-chhip-VII huamchhungah Serchhip Kawnpui North area-ah chhungkaw 7 hnenah Buhfai leh chawhmeh sem tawhin, Chanmari Veng area-ah chhungkaw 15 te buhfai semin chhungkaw 2 te sumfai-a tanpui an nih bakah chhungkaw hrang hrangte chu Zikhlum sem an ni tawh a Serchhip-VIII (P&E Veng) huamchhungah chhungkaw 20 te sumfai-a tanpui niin chhungkaw 5 hnenah a thlawna buhfai sem niin qtl. 2 vel chhekkhawl mek a ni a. New Serchhip South huamchhungah chhungkaw 22 te chu Buhfai,Tel leh chawhmeh pek an nih bakah chhungkaw 2te sumfai-a tanpui niin Bawnghnute sem a ni bawk a, New Serchhip North VC huamchhungah chhungkaw thlanchhuah te hnenah Bawnghnute pack 111 semchhuah niin Zikhlum leh Bawkbawn Kg. 60 chuang sem a ni tawh bawk.