Union Health Minister hnenah Mizoram mamawh thlen

Ni hnih awh Conference of Central Council of Health & Family Welfare vawi 13-na Prithvi Bhavan, New Delhi a neih mekah Mizoram a\anga kal Health Minister, Dr. R. Lalthangliana chuan Mizoram mamawh hrang hrangte Union Health Minister, Harsh Vardhan-a hnenah a thlen.

Mizoram Health Minister in Union Health Minister hnena a thlen zingah hian Mizoram-a Sub-Centre 313, PHC 57 leh UPHC 8, a vaiin 378 te chu kum 2022 hmain Health & Wellness Centre-ah hlankai hman vek tum a nih thu leh nakum March 2020-ah chuan Sub-Centre 49, PHC 56 leh UPHC 8, a vaiin 113-ah hmalak theih beisei a nih tur thu sawiin, India rama AB-PMJAY Health Care Scheme kalpui mekah Family pakhat tana premium Rs.1052 a ram pum a chawlrual a hman chu India hmarchhak state tan a beitham thu leh mihring tamna hmundang nen a hrut rual a theih loh avangin ennawn turin a thlen a. National Health Mission pawisa tun aia tam zawk Mizoram tana ruahman sak tura ngenin, kum upa zawk te Hospital hrang hranga an awmna tur bik khum siamna atan Mizoram sawrkar hmalak dan te leh sum mamawh belh turte pawh a thlen a ni.

Heng bakah hian Tertiary Cancer Care Centre (TCCC), Zemabawk dinna atan sawrkar laipuiin cheng vbc. 44 zet a lo approve tawh laia cheng vbc. 14 emaw chauh Mizoram in ala hmuh chungchang pawh thlenin, a la bang Central sawrkarin a la pek loh chu a rang thei ang bera pek dan ngaihtuahsak turin a ngen a. Mizoram-a Cancer Specialty Hospital dinna tura JICA, Japan te nena thawhhona tur (cheng vbc. 500 Project) tih fel tawh chungchang pawh tarlangin, India ramah pawh \ha ber tur a nih theih thu thlenin sum mamawh belh a awm a nih pawhin Central sawrkar chu lo inhawng turin a chah bawk a. Cheng vbc. 49 senga Mizoram-a Mental Hospital din tur DoNER-a a thlen tawh pawh sawi langin, a hlawhtlin theihnan a theihtawp lo chhuahpui turin Union Minister chu a ngen a. Medical Education changtlung zawk, Medical equipments leh Food & Drugs lama hmasawnna atan a hmalakna tur hrang hrang te pawh a thlen bawk.

Higher & Technical Education changtu Minister ni bawk, Dr. R. Lalthangliana hian nimin khan sawrkar laipui-a Ministry hrang hrang dawr kual nghalin Ministry of Petroleum hotute hnenah Mizoram-a Oil leh Gas hausakna awmze nei leh uluk zawk a hma la turin a thlen a, MZU Southern Campus Lunglei a dinna tur proposal thehluh tawh pawh chak zawka hma laksak tura ngenin, Kawrpuichhuah, Zokhawthar leh Zochachhuah-a Border Trade kalpui tihchangtlun na tur te, Mizoram hmun \henkhat a Border Haat a rang lama siam a nih theihnan a High Level Team te hmun ngei a kal a rawn enfiah turin a ngen bawk.