Serchhip District-a NSS Unit 4 ten a huhovin NSS Foundation Day an hmang

Nimin Sept. 24, 2019 kha India rama National Service Scheme (NSS) dinchampha, NSS Foundation Day vawi 50-na a ni a, Serchhip District chhunga NSS Unit pali (4) te chuan Serchhip Auditorium-ah he Ni hi a huhova hmangin Addl. DC. Chuauhnuna chuan khuallian niin a hmanpui.
Govt. Serchhip College, Govt. Higher Secondary School Serchhip, Brilliant Higher Secondary School leh Thenzawl Higher Secondary School-a NSS Unit ten NSS Foundation Day an hmanna ah hian thupui atan 'Cancer and Tobacco Control' tih chu hman niin khuallian Serchhip Addl. DC, Chuauhnuna chuan Pathian in khawpui chauh ni lo, thingtlang ah pawh thiamna a dah tih sawiin, chu chu taima taka thawk ten an chang \hin thu leh hei hi tunhnai Mizoram puma College te Quiz-a inelna neiha Govt. Serchhip College in lawmman pakhatna an lak khan a tilang tih a sawi a. He thiamna hmang hian tharum chu hneh theih a ni tih sawiin, mihring tha chakna aiin thiamna leh finna chuan thil a ti thei zawk a, chung thiamna pawh chu Pathian in Serchhip-ah hian a dah ve tho ani tih chiang taka kan hriat tawh avangin chumi haichhuak thiam tur leh taima taka rim taka zir turin kalkhawmte a chah bawk.
Khual Zahawm nia he hun hmanpuitu District Urban Development Officer, Vanthangpuii pawhin NSS in Motto a neih, 'Not Me But You' tih chu ropui a tih thu sawiin, mahni in dah\ha a midang te tana luanchhuah an inzirtir chu ropui a tih thu a sawi a, NSS Volunteer te chu faina kawng a nasa zawka hma la chhunzawm zel tur leh \awih ve theilo Plastic hman tlem inzirtirna kal mekah pawh nasa zawka hma la zel turin a sawm bawk.
Nimin a NSS Foundation Day hmanna ah hian he Ni thupui 'Cancer and Tobacco Control' tih hmangin K. Hmingthansangi, District Consaltant, National Tobacco Control Programe chuan zirlai kalkhawmte chu Vaihlo, zuk leh hmuam \hatlohna zirtirna a lem nen entirin zirlaiten an thiam thil chi hrang hrang an entir bawk.
National Service Scheme (NSS) hi kum 1969 khan Mahatma Gandhi piancham kum za-na denchhen a din \an niin, Govt. of India Ministry of Youth Affairs and Sports hnuaia kalpui a ni a, tunah hian Mizoram-ah NSS Unit hi College-ah 105 leh Higher Secondary School-ah 301 a awm mek a, khua leh tui \ha ni tur leh midang te tana thil\ha ti tura zirtir chu he Programe in a a tum lian ber a niin, Mizoram-ah te pawh thing phun te, ruihhlo hman sual laka inveng tura in zirtirte, chhiatna a lo thlen hun a hnatlanga mite \anpuite leh a thlawna thisen pek te chu an hma lakna langsar niin, Pawl anga thisen pe tam ber lawmman pawh an lo dawng tawh bawk a ni.

Comments

Popular posts from this blog

PAN CARD an tih teh fo hi - Laldinpuia