Health Care Scheme leh AB-PMJAY chungchang zirhona Serchhip District-ah neih \an a ni

Thla thar October ni 1 a\anga hman \an tur Health Care Scheme leh Ayushman Bharat -Pradhan Mantri Jan AarogyaYojana (AB-PMJAY) chungchang zirhona chu nimin khan Serchhip District tan neih \an a ni.

Health Care Scheme leh Ayushman Bharat -Pradhan Mantri Jan AarogyaYojana (AB-PMJAY) zirhona Serchhip CMO Conference Hall-a neih hi Serchhip District Medical Superintendent, Dr. ZD. Lalmuanawma chuan kaihruaiin Mizoram State Health Care Society a\angin Dr. C. Vanlalduhsaka, Medical Officer, Mizoram State Health Care Society leh Lalzirtira, IT Incharge, Mizoram State Health Care Society te hnen a\angin damlohna avanga inemkawlna senso bill let theih dan tur atana sawrkarin ruahmanna a siam thar chungchang zirho niin zawhna leh chhanna hun hman a ni bawk.

He huna tarlan a nih danin Mizoram-ah hian Health Care Scheme hi chi hnih awmin heng te hi AB-PMJAY leh Mizoram Health Care Scheme te a ni a. AB-PMJAY hi sawrkar laipui Health Care Scheme niin Golden Card hmangin he ham\hatna hi dawn theih a ni a, Golden Card hi siam lawk theih a nih rualin hman dawn ah pawh siamchawp theih a ni. He ruahmanna hnuaiah hian Socio-Economic and Caste Census (SECC) List-a awm, PM Letter dawng leh 2018 RSBY-a thla la-a Smart Card nei a hming chuang te chuan ham\hatna an dawng thei a. SECC leh 2018 RSBY Smart Card nei Golden Card nei tawh te chuan Golden Card a tharin siam a ngai lo a, Golden Card nei sa te chuan kum 2021 thlengin an Card hi an hmang thei dawn a, nikum-a Health Care-a inziaklut chuan kumin October 1 a\ang chuan AB-PMJAY an hmang thei tawh dawn lo thung a, Golden Card nei te pawhin a tharin Health Care Scheme-a inziahluh a ngai dawn a ni. He ruahmanna hnuaiah hian kum khata damlo damdawi In-a inenkawlna senso cheng nuai 5 thleng hmuh theih dan a awm a, India rama sawrkar pawmpui damdawi In leh he Scheme in a huam damdawi In-ah te he ham\hatna hi hman theih a ni. 

Hetihlai hian October 1, 2019 a\ang bawka hman tur Mizoram State Health Care Scheme-ah hian AB-PMJAY hmang thei lo - BPL, APL leh sawrkar hnathawk ten sawrkara an bill sak theihloh chhungkaw member zawng zawng inziahluh theih a ni dawn thung a. He ruahmanna hnuaia inziaklut te hian kum khat chhunga damdawi In-a an inenkawlna senso cheng nuai 2 thleng an bill thei anga, hetah hian Mizoram pawnlam-a an inenkawlna senso te pawh a huam bawk a ni.

He zirhona hi Vawiin-ah Chhingchhip-ah neih leh a ni anga, hemi hnu hian East Lungdar leh Thenzawl-ah neih leh tur a ni anga. Hetianga zirhona neih zawh a nih hnu hian he ruahmanna dawng thei tura inziahluhna hun chu Veng tin leh khaw tinah hawn zui leh nghal a ni dawn a, November thla tawp thlengin inziahluhna hun hi hawn a ni ang.