MBBS-ah Central pool-a Mizoram quota a tawp; ZMC neih vang a nih thu sawrkar in a sawi

Sawrkar laipui, Government of India-a Ministry of Health & Family Welfare (Deptt. of Health & Family Welfare) chuan Zirtawpni khan central sawrkar hnuaia MBBS zir tur Central Pool quota-a state te seat neih zat tur a tichhuak a, Mizoram chuan seat khatmah a chang lo a, BDS-ah seat pali pek a ni. Hetihlai hian Mizoram sawrkar chuan thuchhuah siamin central in MBBS quota a tihtawp chhan chu State in ama puala Medical College a neih vang a ni, an ti.

Nikum khan Central Pool-ah Mizoram in MBBS Seat 18 leh BDS Seat 7 a chang a, amaherawh chu kumin hian MBBS-ah Seat pek a ni ta lo a, hetihlai hian Medical College nei ve tho Meghalaya chuan Central pool quota a\ang hian seat 50 an chang a, hei hi an Medical College te sawrkar laipui enkawl, State pual a nih loh vang niin BDS seat thum pek an ni bawk. Central enkawlna hnuaia awm Medical College awmna Nagaland pawh MBBS seat hi 40 pek an ni a, BDS seat hi pathum an la chang zui bawk.

Hetianga Mizoram in MBBS Seat a chanloh chungchang hi Higher & Technical Education Department chuan thuchhuah siamin an sawifiah a, India sawrkar, Ministry of Health & Family Welfare chuan India rama State \henkhat, Medical Education lama hnufual bikte tan kumtin Central Pool Quota a\angin MBBS leh BDS seat a pechhuak \hin tih tarlangin, kumin 2019-2020 Academic Session-ah hian kum hmasa lama Central Pool Quota MBBS seats lo dawng \hin, kumina dawng ta lo te an awm nual thu an tarlang a. Arunachal Pradesh, Manipur, Daman & Diu, Dadar & Nagar Haveli leh Mizoram te chuan kum hmasa lama MBBS Seat an chan laiin kumin hian an chang dawnlo nia tarlangin, kum hmasa lama MBBS Central Pool Quota lo dawng \hin, anmahni puala Medical College an neih loh vanga kumin-a la dawng zel pawh Meghalaya, Nagaland, Lakshadweep leh Sikkim an awm thu an tarlang bawk a. “Central Sawrkar chuan Ministry of Health & Family Welfare kaltlangin Zoram Medical College (ZMC) din nan sum tam tak a rawn pe a, Mizoram-in Medical College a nei ve ta a. Nikum lamah ZMC-ah Mizoram chu seat 100 admission pek a ni a, kuminah pawh seat 100 bawk pek leh a ni leh dawn. Heng avang hian dan angin Mizoram State chuan Central Pool Quota MBBS dawng tur a ni tawh lova, Central Sawrkar hmuh danah chuan mahni ke-a ding thei leh puitling tawh ang a lo ni ta a, hei hi sawrkar lam a\ang chuan thil lawmawm tak a ni zawk a ni,” tiin a tarlang bawk.

Mizoram hian Central Pool-ah MBBS Seat changlo mah se NEC a\angin MBBS Seat 12 leh BDS Seat 7 a chang tho a, ZMC-a MBBS Seat 100 awm zinga Seat 70 pawh Mizo zirlaite tan hauh niin hnawhkhah vek a ni tawh bawk.