Dr. K. Beichhua’n NCB hmunpui a tlawh

Excise & Narcotics Minister, Dr. K. Beichhua chuan Mizoram-a ruihhlo leh a kaihhnawih do beihpui thlak tuma inbuatsaihna kal zelah nimin khan Narcotics Control Bureau (NCB) hmunpui tlawhin NCB-a thawktute nen ruihhlo dona kawnga thil pawimawh hrang hrang an sawiho.

Nimin a Narcotics Control Bureau (NCB) Official te nen an inkawmna ah hian Dr. K. Beichhua chuan Mizoram chu ramri dep-a awm a nih avangin ruihhlo luhka ber a nih thu leh Mizoram kaltlanga India rama ruihhlo lut te chu Mizoram buaina chauh ni lovin India rampum buaina a nih thu a sawi a, hei vang hian Central sawrkar leh State sawrkar \angruala do a pawimawh thu a sawi a. Tunlai bungraw changkang zawk nena Excise Enforcement te thuam\hat a pawimawh thu Narcotics Bureau Officer te hnena a thlen bawk.

He hunah hian Narcotics Control Bureau (NCB)-a Deputy Director General, B. Radhika, IPS pawhin ruihhlo tawlhluh kawngah Mizoram dinhmun an hriatpui thu tarlangin, sawrkar laipui a\anga \anpuina awm thei zawng zawng chu khawtlai lova pekchhuah zel an inhuam thu a sawi a. Mizoram Excise Department chu ruihhlo do kawngah Nodal Agency an nih angin State chhunga Agency hrang hrang ten ruihhlo an man leh tihral report kimchang thla tina thehlut \hin turin a ngen nghal bawk.

He Meeting-ah hian ruihhlo do kawnga thawhhona atan zirhona neih te, State sawrkar leh National Narcotics Bureau ten \angruala  Workshop buatsaih \hin an tum thu te leh \angruala ruihhlo dapchhuah beihpui thlak chungchang te sawiho a ni bawk.