Serchhip-ah World Environment Day denchhenin Plastic bawlhhlawh chharkhawmna hun hman a ni

World Environment Day denchhenin nimin khan Serchhip-ah Plastic bawlhhlawh chhar-khawm Ni, 'Mass Plastic Picking Day' hmangin khawpui chhunga Plastic bawlhhlawh chharkhawmna hun hman a ni.

'Mass Plastic Picking Day' pula hun hman hi nimin zing dar 9:30 khan Serchhip District Bawrhsap, Sangchhin Chinzah hovin Serchhip DC Office tual-ah Kick-Off neih niin he hunah hian Bawrhsap chuan kan chenna tura Pathian in min pek kan khawvel leh leilung te chu mihring ten dimdawi leh humhalh nachang kan hrelo tih a sawi a, mihring te tana chenna tlak khawvel dang a awmloh thu leh kan tu leh fa lo \hanlen zelna tur a nih avangin duat taka kan enkawl a pawimawh thu sawiin, Plastic thil te chu mamawh hle mah ila min tichhetu atan chuan kan phal tur a ni lo, a ti a. Plastic lam chi thil kan hman te kan tihtlem a, kan duh tawh loh te chu hman nawn theih tura kan dahkhawm a ngai a, sawrkar pawhin mumal taka Plastic bawlhhlawh te a enkawlna tur hmun a buaipui mek a. Serchhip tana hman tur pawh a hmun tur zawn mek a ni, a ti. He hun hmanna a tel Serchhip Hmar Veng-a Children Sanitation Club member ten kum naupang te an nih lai a\anga ram leilung humhalh a \ulzia leh a pawimawh zia an hre thei chu lawmawm a tih thu a sawi bawk.

Nimin zing-a he hun hman hi UD&PA Department-a Serchhip District Urban Development Officer, Vanthangpuii chuan kaihruaiin DAY-NULM-a District Manager, Grace Lalrinfeli kaihhruaina hnuaiah he huna tel te hian ram leilung humhalh a, plastic te paih darh lo tura intiamna thu an chamrual bawk a ni.

Nimin a 'Mass Plastic Picking Day' hawnna neih hnu hian Children Sanitation Club Member te leh High School hrang hranga zirlai naupangte chuan Serchhip khawpui chhung hmun hrang hrangah plastic lam bawlhhlawh thenfai hna an thawk zui nghal a, Children Sanitation Club te hian College Peng a\anga UD&PA Office thleng kawngpui kam thianfaiin PCR H/S zirlai naupang ten IOC Petrol Pump a\anga UD&PA Office thlengin bawlhhlawh an chharfai bawk a. Govt. JM H/S zirlai naupang ten an School a\anga Serchhip AOC Veng-a DEO Office thleng bawlhhlawh chharfai hna thawkin Govt. Serchhip H/S zirlai naupang ten an School a\anga DEO Office thleng bawlhhlawh an chhar bawk a, heng bawlhhlawh chhara thawk zirlai naupangte hian Plastic \hatloh zia leh hman loh a pawimawh zia inzirtirna thuziak hrang hrang an kenglang bawk a ni.