MHIP General Conference neih niin Vawiin ah hruaitu thlan theih a ni dawn lo

Mizo Hmeichhe Insuihkhawm Pawl (MHIP) chuan nimin khan Aizawl-a Vanapa Hall-ah General Conference vawi 22-na an hmang a. He Conference hi Vawiin-ah chhunzawm tura tih a ni a, kum 2019-2021 chhunga Office Bearer turte thlan tur a nih laiin, thil diklo a awm nia hriat a nih avangin Court-in inthlang lo turin a hriattir.

Nimin a MHIP General Conference hi MHIP Gen. Hqrs. Vice President, Lalthlamuani'n a kaihruai a, Khuallian nia he hun hmanpuitu Horticulture Department Director, Dr. Elizabeth Saipari chuan, hmeichhiate'n ram siam\ha turin tih theih tam tak an neih thu sawiin, “Ram rorelna sanga tel thei turin theihtawp i chhuah ang u. Tun dinhmunah ram rorelna sang berah tel lo mah ila, a hniam zawkah hmasawnna hna thawk turin hmeichhiate kan awm \euh a ni,” a ti. Khuallian chuan, Mizo hmeichhiaten puanbih an uar lehzual chu lawmawm a tih thu sawiin, “Sawrkar pawhin puanbih hi a ngai pawimawh a, kar khata a bih hun tur an bituk a ni. Nu ber te'n puanbih kan uar tlat chuan kan tu leh fate'n an uar zel ang,” a ti a; Mizo hnam incheina te chu hnam dangin an chawisan sak dawn loh avangin, mahni ngeiin chawisan a pawimawh thu a sawi.

He hunah hian MHIP General Hqrs. President Saipuii chuan, Mizoram, khawtlang leh chhungkua a him theihna atan MHIP member zawng zawngte'n tih tur tam tak an neih thu a sawi a, “Hmasawnna rahbi thar chuangkai turin kan thiamna te, kan finna te, kan chaknate mi dang te'n malsawmna an dawn theihna atan i hlan nawn leh ang u,” a ti bawk.

MHIP General Conference hi Vawiin ah chhunzawmin kum 2019-2021 chhunga hruaitu turte thlan tur a ni. Mahse, inthlan tur chungchang ah hian Court-ah thubuai thehluh a awm avangin Aizawl District Court chuan inthlang lo turin MHIP chu nimin khan a hriattir a. Aizawl District Court-a thubuai thehluttute Ukil tarlan danin, MHIP Gen.Hqrs. OB tur thlan turah MHIP Gen. Hqrs. hruaitute'n thil dik tawk lo an ti a, Secret Ballot tihchingpen a awm nia hriat a nih avangin, Aizawl District Court chuan MHIP chu inthlang rih lo tura hriattirin Order a tichhuak a ni.

MHIP General Secretary, T. Lalthangpuii tarlan danin, MHIP-ah hian Sub-Hqrs. pasarih (7), Block 26, Joint 24 leh Branch 729 awmin, Member 2,89,300 a awm mek a ni.