The Citizenship (Amendment) Bill, 2016 duhloh lantir nan Vawiin-ah Total Bandh nei dawn

India hmarchhak State pariat (8)-a Zirlai Pawl inzawmkhawm, North East Students’ Organisation (NESO) huaihawtin Vawiin hian 'The Citizenship (Amendment) Bill, 2016' duhloh lantirin India hmarchhak-ah Total Bandh neih an tum a, Serchhip-ah pawh he Total Bandh hi kalpui ve a ni ang.

Hemi chungchanga MZP General Hqrs. thuchhuah siamin a tarlan danin India hmarchhak State pariat (8)-a zirlai pawl inzawmkhawm, North East Students’ Organisation (NESO) chuan The Citizenship Amendment Bill, 2016 chu Indian Parliament a pass tumna a awm mek thu leh hei hi an pawm lo hle tih an tarlang a. He bill pass tumna hi North East State zirlaite’n a ruala Total Bandh neih nise a tih avangin, Citizenship Amendment Bill 2016 pass tum duhlohna lantirna atan hian a huho in Total Bandh hi neih a ni dawn tih an tarlang a, Mizoram-ah pawh MZP huaihawtin rampumah Total Bandh hi neih a ni dawn tih an tarlang a ni.

MZP thuchhuah chuan The Citizenship Amendment Bill, 2016 chu North East mi ten an duhlo tlang hle tih tarlangin, The Citizenship Amendment Bill, 2016 hian India khua leh tui zawng zawng a nghawng avangin Citizenship Amendment Bill 2016 hi pawm a nih chuan Afghanistan, Bangladesh leh Pakistan a\anga India-a lo lut heng- Hindu, Sikh, Buddhist, Jain, Persi te chu kum 6 chhung India ah an lo awm tawh a nih chuan India khua leh tui nihna pek tur an ni a. He bill hi Sakhaw behchhana Citizen nih theihna tur Bill a ni tih an tarlang a. The Citizenship Amendment bill, 2016 chu Indian Parliament a pass a nih chuan keini, Mizoram tan phei chuan a hlauhawm zual hle nia an hriat thu tarlangin, Bangladesh a\anga dan lova lo lut Chakma foreigner te hian awlsam takin India khua leh tui nihna an nei thei dawn a. Mizoram-ah pawh NGO Co-ordination Committee kaihhruaina hnuaiah All Political party leh Joint NGO pawhin duhlohna lantir a ni tawh a, Memorandum in ang tlang thehluh a ni tawh nghe nghe tih an tarlang a. The Citizenship Amendment bill, 2016 zirchiangtu tur a din Joint Parliamentary Committee on Citizenship Amendment bill, 2016 te pawhin Mizoram lo tlawh ve tura ngen anih hnu pawhin, North East State dangte a tlawh laiin, Mizoram chu a rawn tlawh ve duh lo niin an tarlang bawk.

Ruahman lawk ang chuan Vawiin a India hmarchhak huap Total Bandh neih tur hi zing dar 5:00 a\anga tlai dar 4:00 thleng neih tur niin mipuite chu he Total Bandh hi thlawp vek turin an ngen a. MZP Hqrs. Serchhip pawhin The Citizenship (Amendment) Bill, 2016 hi an duhloh zia lantir nan khaw chhunga Office, zirna In leh dawrkai te pawh in khar tura ngen leh hriattir an ni tih an tarlang a, lirthei hmanga eizawngte pawh chawl a, mipui zawng zawng khawlai leng chhuak lova he Total Bandh hi thlawp turin an ngen bawk.

He Total Bandh hian Chanchinbu mite, Chanchinbu sem te, Venhimna hna thawktu Police te, PHE Tuisem, Damdawi In-a thawk leh damlo te, Bawnghnute sem leh P&E Department-a Emergency Duty te a huam dawnloh thu an tarlang bawk.

Hetihlai hian Central YMA chuan nimin khan thuchhuah siamin India Sawrkar laipuiin Citizenship Amendment Bill, 2016 a buaipui mek chungchanga NESO-in North East pum huapa dodalna Vawiin a an huaihawt tura MZP in Mizoram puma hma a lakna chu an thlawp thu an tarlang a. Foreigner engemaw zat awlsam zawka India khua leh tuia rihluh theihna tur Bill hi \ha ti lovin Prime Minister leh Union Home Miniter-ah te pawh kaltlangpui lo turin ngenna an lo siam thawh \hin thu an tarlang. ZPM pawhin nimin khan thuchhuah siamin he hmalakna kal mek hi an thlawp thu an tarlang a. MNF President, Zoramthanga pawhin nimin a Mizo Hnam Run-a thu a sawina ah NESO leh MZP hmalakna chu zaa za-a an thlawp thu a sawi bawk.