NESO bultumin India hmarchhak State hrang hrangah Black Day hman a ni

Nort East Students Organisation (NESO) bultumin Inrinni khan hmarchhak State hrang hrangah ‘The Citizenship (Amendment) Bill, 2016’ duh lohna lantirtu zirlaite, sipai tha chakna hmanga dimna tel miahlo a a beih duh loh nan lungawiloh lantirna ‘Black Day’ hman a ni a. Mizoram-ah pawh Mizo Zirlai Pawl(MZP) bultumin Black Day hi hman ve niin hmun hrang hrangah Flag dum tar a ni.

MZP General Headquarters bultuma Black Day hmanna pui ber MZP Pisapui kawt tualah a kick off neih a ni a, he hunah hian MZP President L. Ramdinliana Renthlei chuan The Citizenship (Amendment) Bill, 2016 chu Indian Parliament-a pass duhlohna dodaltu zirlaite chunga Police chet dan avanga NESO bultuma North East puma Black Day hman a ngai ta chu pawi an ti hle tih sawiin, “Kan zirlaipui state danga Police avanga hliam tuarte hi MZP chuan kan tawrhpui hle a, hetiang hi thleng nawn tawh lo se kan duh hle a ni. North East State-ah pawh BJP sawrkarna state apiangah sawrkarin zirlaite a bei nasa a, zirlaite pawhin hliam an tuar nasa a ni. Mizoram-ah pawh Mizoram BJP hi MZP-in engtin nge kan tih ve dawn tih hi kan la ngaihtuah dawn a, Mizoram-ah hian BJP a awm ve kher pawh hi ngai kan ti lo mai thei a ni,” a ti a. The Citizenship (Amendment) Bill, 2016 chu pass a nih loh nan hma an la zel dawn tih a sawi bawk.

He huna thusawitu dang NESO Fin. Secretary, Ricky Lalbiakmawia chuan NESO chuan The Citizenship Amendment Bill, 2016 Indian Parliament a pass a nih loh nan hma an la zel dawn tih sawiin, he bill an duhlohna an lantir avanga State hrang hranga an zirlai pui ten Police kut tuar a Silai a kah te an ni chu an dem takzet tih a sawi a. Tripura State Sawrkar Police ten Zirlai leh mipui pungkhawm Silai hmanga an kah avang te, hliam tuarte dahna Ambulance chu Police ten an beih avang te, Khumlung Hospital, Tripura-a hliam tuarte tlawh tura kal NESO hotute Police ten tlawh phal lova an lo dan avang leh January 11-a Imphal Manipur-a The Citizenship (Amendment) Bill, 2016 duhlohna lan tir avanga mi pali (4) hliam na tak an tawrh avang te in Black Day hi North East pumpui ah an hman thu a sawi a. Zirlaite hliam tuar enkawlna senso zawng zawng hi anmahni State \heuh ah an state sawrkar theuh hian tum ngei turin NESO chuan an phut tlat tih a sawi bawk.