Synod Inkhawmpui nei mek

Mizoram Synod Inkhawmpui rorel ni hnihna chu nimin Ningani khan chhunzawm a ni a, rawngbawlna chungchanga thil pawimawh tak tak an rel.

Nimin a Synod Inkhawmpui rorelna hun hi Moderator, Rev. R. Lalhmingthanga’n a kaihruai a, General Agenda rel \an niin 12-na thleng an rel hman a, Synod Hospital Durtlang-ah inbiakpawhna \ha zawk a awm theih nan kawng zawn chungchang chu hmalak mek a ni an ti a, Pro-Pastor dahna hmun tun aia uluk zawka ngaih-tuah rawtna chu uluk zawka kalpui ni se an ti a, Vellore Mizoram House-a staff nurse dah rawtna chu hmun dang pawh thlir telin Synod Executive Committee (SEC)-in hma la rawh se an ti a, Pastor transfer & posting Synod-a pharh hmaa leaked out lo tura \an lak rawt thu leh Synod Inkhawmpui dawna Committee hrang hrang thurel sawi darh loh dan zawn tih chu kaihkawp niin SEC-in lo bawhzui se an ti a, Synod hnuaia thawktu lakah zuk leh hmuama fihlim chauh lak rawtna pawh SEC-in lo bawhzui se an ti.

Heng bakah hian Missionary transfer & Posting tun aia mumal zawka tih rawtna te, Home Mission North-a rawngbawlna \ha zawka kalpui dan zawn rawtna te, Tunlai thiamna hmanga naupai leh fa neih chungchang inkaih-hruaina tihdanglam rawtna leh Synod Hospital Charity Fund puala thawhlawm thawh chung-chang pawh SEC bawhzui turin an dah a ni.

Synod Inkhawmpui Aizawl Electric Veng Kohhran-a neih mek ah hian Vawiin hian rorelna neih chhunzawm leh a ni anga, General Agenda 13-na a\angin chhunzawm a ni ang.

Mizoram Synod hnuaiah hian Presbytery 51 awmin Pastor 500 leh Pro Pastor 52 an awm mek a, Upa 5234 awmin Kohhran member 604,512 an awm a, kum hmasa aiin 10,057 an pung a, Dan Zawhkim 422,921 an awm bawk. Kum kalta chhungin member boral 3,784 awmin Bial thar 12 hawn a ni bawk a. Mizoram Synod-ah hian thawktu 3500 an awm mek a ni.