Latest News

Serchhip DEO in thuthar thehdarhtute kawmin inthlanna atana inbuatsaihna te a sawipui

Serchhip District Election Officer, Sangchhin Chinzah chuan nimin khan Serchhip-a thuthar thehdarhtute kawmin Assembly inthlanpui neih tura Serchhip District inbuatsaihna hrang hrang leh thuthar thehdarhtute tana hriattur pawimawh hrang hrangte a sawipui.

Serchhip District Bawrhsap Pisa-a he inkawmna ah hian District Election Officer, Sangchhin Chinzah chuan Assembly inthlanpui neih tur atan inbuatsaihna an peihfel thawkhat tawh tih sawiin, inthlanna neih hun tur puan a nih hnuah pawh tihtur \ul ang ang te chu buaipui mek zel a nih thu a sawi a. Inthlanna thianghlim, dik leh felfai neih a nih theih nan thuthar thehdarhtute nen thawhhona \ha tak neih a duh thu sawiin, inthlang ram kan nih avangin Election aia pawimawh leh ngaih pawimawh ngai thildang a awm loh thu a sawi a. Thuthar thehdarhtute nen thawhhona \ha tak an neih chuan midang te entawn tlak ni tura inthlanna hi neih theih a beisei thu a sawi a. Mipui ten thudik leh rintlak an hriat theihna tura theihtawp chhuah zel turin thuthar thehdarhtute chu a sawm bawk.
He inkawmhona hunah hian District Information & Public Relations Officer, K. Saitluanga chuan Election Commission of India hnuaia inthlanna buatsaih hrang hranga thuthar thehdarhtute, Print Media leh Electronic Media te hriat tur pawimawh hrang hrang leh National Broadcasting Standard Authority ina duan te sawifiahin, mipui ten zau zawka an hriat theihna tura Mizo \awng-a duan chu thuthar thehdarhtute hnenah hian a sem nghal bawk a. Serchhip District Addl. DC, Chuauhnuna chuan inthlanpui neihna tura Serchhip District-a inbuatsaihna kalpui a nih dan te a sawi bakah Serchhip Election Officer, Lalvenhima chuan inthlanna atana hmanrua an lakkhawm te leh inthlanna felfai neih a nih theihna tura ruahmanna an neih leh tun thlenga hma an lakna hrang hrangte pawh a tarlang nghal bawk.
He huna tarlan a nih danin Assembly inthlanpui a hman tur Electoral Roll chu Nomination Paper thehlut te tana inhnuhdawhna hun khar a nih hma chuan siam\hat theih reng a ni dawn a, inthlanna a vote tla te chhiar a nih hunah felfai taka zawh thuai a nih theih nan Counting Hall pathum siamin heng Hall tinah hian Constituency wise-a vote tla te chhiarin Round thum chhiar ah zawh beisei a ni.
Tun \uma Assembly inthlanna neih turah hian Vote thlakna khawl, Electronic Voting Machine (EVM) chu hman leh a ni dawn a, Constituency pathum (3)-ah hian Polling Station 77 awmin Vote thlakna khawl zawng zawngah hian VVPAT hman a nih dawn thu leh Vote chhiar hunah Constituency tina Polling Station pakhat-a VVPAT-a Vote tla te chu chhiar tel a nih dawn thu te, Serchhip District chhungah venhim ngai bik Polling Station a awm loh thu leh Polling Station tinah rualbanlo te pawhin awlsam zawka Vote an thlak theihna turin ruahmanna siam a nih thu tarlan a ni a. Serchhip District chhungah hian hetiang rualbanlo vote thlak thei hi mi 291 awmin heng te hi Vote thlak Ni-ah MPF ten an buaipui dawn thu te tarlan a ni a. Serchhip District chhunga venhimna hna thawk turin Mizoram sawrkar hnuaia Police te bakah CRPF sipai pawh \hahnem tak chahluh an ni dawn bawk a ni.
Serchhip District chhungah hian tun din-hmun ah Vote thlakna khawl, Ballot Unit 128, Control Unit 126 leh VVPAT 115 te awm mekin hei hi 129 \heuh awm turin Election Commission-ah dil belh mek a ni a, Election neih hun tur puan a nih hnuah Model Code of Conducts bawhchhia an awm leh awmloh te enkualin tunah hian Monitoring Team hrang hrang ten District chhung khaw hrang hrang an fangkual tawh bawk a ni.

Comments

Popular News (Last 30 Days)