Mizoram Assembly inthlanpui Nov. 28-ah neiin Dec. 11, 2018-ah vote tla te chhiar a ni ang

Mizoram Legislative Assembly inthlanpui chu November 28, 2018 (Nilaini) hian neih a ni dawn a, he vote inthlanpuia tla te hi December 11, 2018 (Thawhlehni)-ah chhiar a ni ang. Mizoram State Assembly inthlanna neih tur puan rual hian State 4-a inthlanna neih dan tur pawh puan nghal a ni bawk.

Inrinni khan Chief Election Commissioner (CEC), Om Prakash Rawat chuan New Delhi-ah thuthar thehdarhtute kawmin ramchhunga State 5- Madhya Pradesh, Rajasthan, Chhattisgarh, Telangana leh Mizoram ten Assembly inthlanpui an neih hun tur hi a puang a, CEC in a puan dan chuan Seat 40 awmna Mizoram State Assembly inthlanpui neih tur atan hian thla thar Nov. 2-ah hriattirna tihchhuah a ni anga, hemi a\ang hian inthlanna chuah tum te tan Hming pekluhna hun hawngin Nov. ni 9, 2018 thleng inthlan chuh tumte tan hming pekluh theih a ni anga, heng hming pekluh te hi Nov. 12-ah enfiahin inhnukdawk duhte tan Nov. 14 thleng hun hawn a nih bakah Nov. 28, Nilaini-ah vote thlak a ni ang. He inthlanna a Vote tla te hi State dang inthlanna a Vote tla te nen December 11, 2018-ah a ruala chhiar tur niin inthlan kaihhnawih thil zawng zawng hi December ni 13, 2018 a zawh fel vek tura ruahman a ni. Election Commission of India in Assembly inthlanna neih hun tur a puanchhuah rual hian Election Model Code of Conducts pawh hman \an nghal a nih thu Chief Election Commissioner chuan sawiin, inthlanna neihna turah hian Candidate pakhat in cheng nuai 20 thleng a hman thei dawn thu a sawi bawk.

Chief Election Commissioner in Mizoram Assembly inthlan hun tur a puan hnu Inrinni tlai dar 4:00 khan Mizoram Chief Electoral Officer, SB. Shashank chuan thuthar thehdarhtute kawmin inthlanpui neih tura thil pawimawh te a sawifiah nghal a, inthlan hun puan a nih tak avangin Model Code of Conduct hman nghal a ni tih sawiin, hei hi Political Party hrang hrang leh Official-te chu zawm tura ngen an nih thu leh Voter te duhthlanna tibuai thei zawnga chet lakna chi reng reng chu khap a nih thu a sawi a. Inthlang turin Mizoram chu a inpeih tih sawiin, ruahmanna engkim peih a nih thu leh MLA bial tinah hmeichhe vote thlakna tur bik leh hmeichhe duty-na tur bik (Women Polling Station) pakhat \heuh dah a ni dawn niin a sawi bawk.

Mizoram Chief Electoral Officer, SB. Shashank sawi danin, Mizoram District 8-a Assembly Seat 40-ah mipuite Vote thlakna turin Polling Station 1164 a awm a, Polling Station buaipuitu tur Sector 139 awmin, Polling Station zawng zawngah Electronic Voting Machine (EVM) Ballot Unit 1859 leh Control Unit 1841 hman a ni dawn a ni. Mizoram inthlanpuiah hian a vawikhatnan VVPAT 1751 hman a ni bawk ang.

Inthlanpui neih tur atan hian venhimna pawh \ha taka ruhman niin Mizoram State Police- Company 48 leh Central Armed Police Force Company 40 an awm dawn a, kumin ah hian Polling Station 125-ah vote thlak che vel lai en theihna, Webcasting hman a ni dawn bawk a ni.

Mizoram-a inthlanpui neih tur puan a nih lai thleng hian Mizoram pumah Vote nei thei mi 7,68,181 an awm a, State Assembly Inthlan hnuhnung ber kum 2013 khan vote nei zawng zawng a\anga 83% in vote an thlak a ni.

Election Commission-in Mizorama Assembly inthlan hun a puan rual hian state dang 4 - Madhya Pradesh, Rajasthan, Chhattisgarh leh Telangana-te inthlan hun tur puan nghal a ni a, Chhattisgarh-ah chuan vote thlak hi \um 2, November ni 12 leh ni 20-ah te neih a ni dawn a. Madhya Pradesh leh Mizoram in a ruala inthlanna neiin November ni 28-ah vote an thlak ang a, Rajasthan leh Telangana-te chuan December ni 7-ah vote an thlak dawn a, heng State hrang hrang inthlanna a Vote tla te hi a rualin December 11-ah chhiar a ni ang.