Ramchhung hmundangte rualin Serchhip-ah Zirtirtute Ni urhsun taka hman a ni

Nimin September 5, 2018 kha Zirtirtute Ni, Teachers’ Day a ni a, Serchhip-ah chuan he Ni hi zirnaIn hrang hrang ten anmahni remchan dan angin mahni School \heuh ah an hmang a. Serchhip DEO, Lawmawma chuan he Ni hi Presbyterian English School Serchhip-ah a hmanpui a ni.

Nimin a Zirtirtute Ni ramchhung hmun hrang hrangah urhsun tak leh ropui taka hman niin Serchhip-ah chuan Serchhip District Level Committee on Celebration of Teachers’ Day, 2018 in ruahmanna an lo siam tawh angin zirna In hrang hrang ten anmahni hmun ah an remchan dan angin an hmang a, zirlai naupang ten an zirtirtute hnenah Pangpar leh thilpek chi hrang hrang hlanin zirna In tam takah he Ni puala inkhawm buatsaih niin Zirtitute chawimawina hun hman a ni.

Serchhip District Education Officer (DEO), Lawmawma chuan Zirtirtute Ni hi Presbyterian English School, Serchhip-ah hmanpuiin Zirtirtute chibai a buk a, Zirtirtute Ni chu India sawrkar pawhin ngai pawimawhin India Ni pawimawh ah dah a nih thu a sawi a. Zirtirtu hna chu hna ropui leh hna zahawm a nih thu sawiin, lehkha zir sanga mihring in hma kan sawn theihna turin lehkha kan zir tih a sawi a. Chutiang ni theia min siamtu chu Zirtirtute an ni tih sawiin, hei vang hian chawimawi loh theih an nilo tih a sawi. Zirtirtute chuan Zirtirtute nun dik tak leh Zirtirtu in a tihtur an hriat a pawimawh thu pawh sawiin, an hna chu eizawnna piah lamah rawngbawlna a ngai turin a chah bawk.

Serchhip DEO chuan Serchhip District chu kan vanneih thu sawiin, nikum-ah rampum huapa Zirtirtu \ha chawimawina leh State pum huapa zirtirtu \ha chawimawina dawngtu mi pakhat ve ve kan neih thu leh anni bakah hian Zirtirtu \ha chawimawi tur tam tak an la awm thu a sawi a. India rama District hrang hrang zingah Serchhip District chu District lehkhathiam ber, Literacy rate a sang ber kan nih thu sawiin, amah-erawh chu National Achivement Survey (NAS)-a School thlanbik te a\anga School Standard tehna ah Serchhip District chu 6-na kan nih thu leh hetiang hi kan dinhmun a nih avangin \an lak lehzual kan ngai tih a sawi a. Hei vang hian Quality Education lamah \anlak a \ul thu a sawi bawk a. He Ni ah hian Zirtirtute chu Zirtirtu \ha chawimawina dawng thei tura inpuahchah tur leh Quality Education nei tura \antlanpui atan a sawm nghal bawk.

Zirtirtute Ni hi India Vice President hmasa ber leh President pahnihna, Dr. Sarvepalli Radhakrishnan pianchamphaphak-ah hman \hin a ni a, Dr. Sarvepalli Radhakrishnan hi kum 1888 Sept. 5 khan tuna Tamil Nadu State chhung Thiruttani-ah a piang a, May 14, 1962 a\anga May 13, 1967 chhung India President hna a chelh a, Professor ropui tia sawi \hin niin kum 1954 khan Bharat Ratna pawh hlan a lo ni tawh a, kum 1962 a\ang khan a piancham chu rampum ah Zirtirtute Ni, Teachers’ Day atan hian hman a. Kum 1975 April 17 khan kum 86 mi niin Madras, Tamil Nadu-ah a boral a ni.