Cheng nuai 148.55 senga Tarpi tlang-a DPRC sak thar Chief Minister in a hawng

Cheng nuai 148.55 senga Serchhip Tarpi tlang-a District Pachayati Resource Centre (DPRC) building sak thar chu nimin khan Chief Minister, Lal Thanhawla chuan a hawng a, he Building hawn thar tak chu Village Council te bakah mipui ten \angkai taka an hman a beisei thu a sawi.

District Panchayat Resource Centre (DPRC) Building thar hawnna hunah hian Chief Minister, Lal Thanhawla chuan India rama Panchayati Raj Institution kalpui \an a nih dawn lai khan Prime Minister te nen sawidunna neiin Mizoram in mipuite thlanchhuah ngei Village Council \ha taka kan lo kalpui tawh avangin Village Council kalphung hi kan hmang tlang ta zawk tih sawiin, Panchayati Raj Institution in ruahmanna \ha tak tak a siamte chu kan senglut zel thung, a ti a. Khawtin ten mahni-a ro inrelna \ha leh rintlak (Local Self Government) kan neih theih nan duh taka kan thlan kan Village Council member te training \ha zawk kan pek a ngai a. Hei mai bakah hian Dan thar te lo piangin ruahmanna kalpui dan thar a lo chhuak a, thil thar a lo piang zel a, chung ang zawng zawngte hrethiam a, khawvel changkang zel man thiam chunga khawtlang an kaihhruai theih nan he Centre hi a \ul hle a ni, a ti a. District danga DPRC an hawn tawh te pawh mipuiten an hmang \angkai hle nia a hriat thu sawiin, Serchhip District chhunga VC member zawng zawngte chu he hmun thar hi an inzirna hmun pui, hnathawk tlaka an intuaihriamna hmun pawimawh a nihzia hriaa \angkai taka lo hmang turin a chah a. Mikhual 30 zet thlen theih nghalna a neih lehzel avangin a hlut thu leh duat tak leh thianghlim taka enkawl a \ul thu a sawi bawk
Hei bakah hian Chief Minister, Lal Thanhawla chuan Mizorama remna leh muanna lo awm chhoh dan te, remna kan hmuh hnua Mizoram mipuite dinhmun harsat chhoh dan te, chung mi harsa zawkte khaichhuah nana sawiselna leh deusawhna karah sawrkarin Rangva a sem \hin dan te, chumi hnuah miharsa zawkte rahbi tuksakna atan NLUP a lo kalpui tawh \hin dan te, tunhnua NLUP leh NEDP sawrkarin a kalpui chhoh dan leh Mizoramin hma kan sawn pui ziate a tarlang bawk a. Tunhnaia NLUP chungchang High Court-a thu thehluh pawh sawiin, NLUP chu Stay a nih loh thu leh Guideline erawh an lo Notify loh avangin Gazatte-ah tihchhuah a nih tawh thu a sawi a, NLUP pawh sem kal reng a nih thu a sawi bawk.
Serchhip-a District Panchayati Resource Centre Building hawnna hun hi SIRD&PR Director, Maria CT. Zuali chuan kaihruaiin Er. C. Lalthlansanga, Core Faculty (RE) chuan Technical Report a pe a, Report a\anga a lan danin he Building thar hi Oct. 1, 2016-a sak \an niin kumin Jan. 19 khan sak zawh a ni a, a chhuat zau zawng 400 square metres niin a pumpui zau zawng chu square metres 685 a ni.
Cheng nuai 148.55 senga sak he Building-ah hian mi 40 lenna Conference Hall leh mi 80 lenna Auditorium (Sound leh Projector awmsa) bakah mi 2 zel riah theihna Room 15 a awm bawk a, Head Faculty Room, Library Hall leh Office dang bakah eirawngbawlna leh a ruala mi 30 in chaw an ei theihna tur Room te pawh a awm bawk a. PC Vanlalsawma, Serchhip (1st Clss Contractor) chuan a sa a ni.
Serchhip-a District Panchat Resource Centre-ah hian thawktu mi pathum awmin tunah hian mumal taka Office hna kalpui a ni tawh a, sawrkar Department \henkhat te pawhin hmang tawhin a building bakah hian a panna kawng pawh Concrete hmanga siam a ni tawh bawk a. He building hi thla hmasa khan hawn tura lo ruahman ni tawh mah se rokhawlhna a awm tak avanga \hulh a nih hnuah nimin khan hawn a ni ta a ni.
SIRD&PR hian Mamit, Siaha leh Cham-phai-ah te DPRC hi an lo hawng tawh a, nimin a he Building hawnna ah hian sawrkar Department hotute bakah District chhunga Village Council te an tel \ha hle a ni.

Popular posts from this blog

PAN CARD an tih teh fo hi - Laldinpuia