Mizoram-a Tlawmngai pawl leh Political Party ten Bru laklet tur chungchangah inrawnkhawmna an nei

Tripura a\anga Bru raltlante Mizoram-a hruaikir tura ruahman mekah hemi atana hmalakna te leh Bru te tana Electoral Roll Revision neih tur thlirin nimin khan Home Minister, R. Lalzirliana hovin Mizoram-a recognised Political party hrang hrang te leh NGO pawl hrang hrangte chuan inrawnkhawmna an nei.

He inrawnkhawmna Secretariat Conference Hall-a neih ah hian Reang (Bru) te tana Summary Electoral Roll Revision Relief Camp a neih chungchang leh sawrkar laipui, Mizoram leh Tripura State sawrkar leh MBDPF te inremna ziah anga Dt.14.08.2018 a\anga Reang (Bru) pemte hruaikir hna \an tura Sawrkar ruahmanna chungchang te Home Minister chuan a sawifiah hmasa a. Hun hmasa lam a hmalak tawhna te leh tuna hmalakna kalmek te Home Minister chuan sawiin, Mizoram sawrkar duhdan leh Mizo mipuite duhdan chu a danglam lo tih a sawi bawk.
Home Minister, R. Lalzirliana chuan Mizoram chhungah ngei Bru rawn kir duhte tana Summary Electoral Roll Revision leh inthlanpui-a Vote thlak chu sawrkar dinna leh duhdan a ni tih sawiin, hemi chungchangah hian Chief Minister, Lal Thanhawla pawhin Ministry of Home Affairs (MHA) leh Election Commission of India (ECI) hnenah lehkha thawn tawhin Mizoram mipui leh sawrkar duhdan a thuhmun tih chiang taka ziakin Mizoram chhungah ngei Electoral Roll Revision leh Vote thlak chu Mizoram sawrkar duhdan a ni tih a thlen tawh tih a sawi a. Chief Secretary leh Principal Secretary (Home) te pawhin Mizoram \anchhan te theihtawp chhuahin ECI chu vawi 3 lai an sawipui tawh tih sawiin, ECI thutlukna hnuhnung berah chuan Bru pem te tan Summary Electoral Roll Revision chu Tripura Relief Camp-ah neih tur tih leh Vote thlak chu Mizoram-ah tih a ni a. Mizoram sawrkar duhdan ni lo mahse, inthlang ram kan nih angin inthlanna kaihhnawih a thuneitu sang ber Election Commission of India (ECI) thupek anga Mizoram sawrkar chuan hma a lak tak mai a ngai tih a sawi bawk.
He Meeting-ah hian Home Minister sawmna angin Reang (Bru) te tana Summary Electoral Roll Revision chungchang leh Bru Repatriation & Rehabilitation from Tripura to Mizoram indawrna chungchanga Mizoram sawrkar aiawh te a\angin Home Principal Secretary, Lalnunmawia Chuaungo bakah Home Additional Secretay, Lalbiakzama ten report an pe a. Hemi hnu hian sawihona, rawtna, ngaihdan sawina hun, zawhna leh chhanna hun neih chhunzawm a ni a. Reang (Bru) te tana Summary Electoral Roll Revision chungchanga he meetinga kalkhawm te thutlukna chu Mizoram sawrkarin ECI-ah thlen se an ti bawk.
Kumin July 3 khan sawrkar laipui, Mizo-ram leh Tripura State sawrkar leh Mizoram Bru Displaced People Forum te chuan Assembly Election 2018 hmaa Bru te Mizorama lo kir leh turin Inremna Thuthlung an ziak a. He Inremna Thuthlung ziah hnu hian Mizoram Sawrkar chuan September, 2018 chhung ngeia Mizoram a hruaikir an nih theihna turin Action leh Movement Plan a siam a. He ruahmanna hi ECI duhdan angin 14th August, 2018 a\anga \anin 10th September, 2018 ah zo hman tura ruahman a ni. Road Map - IV angin chhungkaw 3455 laklet leh nan a summawh zat Ministry of Home Affairs-a thlen chu cheng vbc. 68.60 a ni a. Bru hruaikir turte enfiahna November 2016-a neih a nih hnuah Bru chhungkaw laklet tur zat chu 5407 a lo ni ta a. Sum mamawh zat a pun avangin senso zat tura ngaih cheng vbc. 68.60 cheng vbc. 121.3-a siam \hat niin MHA-ah thlen a ni a. Sawrkar laipui remtihna nghah mek a ni.
He inrawnkhawmna ah hian Mizoram Joint NGOs Coordination Committee, Central YMA, MHIP, MUP, MZP leh MSU bakah Political party- MPCC, MNF, ZNP, MPC, BJP leh MJA aiawhte telin sawrkar lam a\angin hotu lian te pawh an tel kim hle a ni.

Latest News

Chief Minister hovin Council of Minister \hukhawm

Chief Minister, Lal Thanhawla hovin Council of Minister te chu niminpiah Chief Secretary’s Conference Room-ah \hukhawmin Department 9 a\an...

Popular News