Serchhip khawpui chhung NH. 54 kamah Side Drain laih hnatlangpui neih a ni dawn

Nimin khan Serchhip DC’s Conference Hall-ah Serchhip District Sanitation Task Force te leh Serchhip khawpui chhunga Branch YMA hrang hrang te, Village Council hrang hrang te chuan Serchhip paltlangtu NH. 54-a Side Drain laia hnatlang koh dan tur an rel.
He rorel kaihruaitu Serchhip District Bawrhsap leh Task Force Chairman ni bawk, Sangchhin Chinzah chuan, nikuma UD&PA buatsaih khawpui fai inelna ah Serchhip chuan kawng dangah Mark hmu \ha viau mah se, Mark 15 zet putu, Side Drain lamah kan pachhe em em tih sawiin, a bik takin Serchhip khawchhung kawngpui ber, KM 5 vel zeta thui NH. 54 hian Side Drain a neih loh vang a ni tih a sawi a. Highway lama thuneitute hnenah thlen \hin mah se tunah hian National Highway-54 hi Double lane a zauh tura hmalak mek a ni bawk si a, an tan a tihnghaihna tak pawh a awm lova. District Sanitation Task Force chuan ngun taka a ngaihtuah hnuin concrete kher lo pawha Side Drain laihchhuah vek ngei \ha a ti ta a ni, a ti.
Bawrhsap chuan he hmalakna bawhzui turin VL. Remliana, PD, DRDA kaihhruaina hnuaiah Sub-Committee dinin sum mamawh zual phuhruk nan Department Officer te hnenah vehbur a khawn bawk a. Officer tlawmngai ten thawhlawm Rs. 80,000 chuang an thawh leh State Level Sanitation Task Force a\anga Side Drain component sum lokal te nena belh khawmin Side Drain chu laih ruahman a nih thu sawiin, chumi bawhzui tur hian Meeting chu koh a nih thu a sawi a. Hnatlang hi Serchhip-a JCB neitute zawng zawng, NH. 54 paltlang Branch YMA te leh leivung paihna chi Truck neitute nen tlawmngaih chhuaha beih tura ruahman a nih thu sawiin, District Sanitation Task Force chuan lirthei tui man te an pe thei vel chauh dawn tih a sawi bawk.
Nimin-a Meeting chuan hnatlang thawhkhatna atana Sub-Committee in tun Inrinni lo awm tur, July 28, 2018 a lo ruahman chhin chu pawmin, Village Council aiawhte chuan an vengchhung Branch YMA hnatlang chhun thingpui man chu thawhlawm tlingkhawm a\anga pek ngai lova an lo ngaihtuah sak hlawm theih tur thu an sawi a, NH. 54 paltlang chiah loh Branch te pawh an huamchhunga hnatlang lo ko ve tura beisei an ni bawk a, lirthei leh JCB neitute pawhin phur taka an thawhchhuah pui theih tur thu an sawi hlawm a ni.
Side Drain laih hnatlang pui koh a nih dawn avang hian kawngpui kama bungrua leh lirthei dahtu te chu lo insengfel hmasa tura ngen leh hriattir an ni a, Kikawn a\anga Sailiamkawn inkar chu Sector pali-ah \hen niin pawl hrang hrangten an thawk anga, a zo hmasa in a zo hnuhnung an pui zui zel dawn a ni. Hnatlang hi nikhatah thawh zawh hman a nih loh pawhin thawh zui zel tura ruahmanna siam a ni.

Popular posts from this blog

PAN CARD an tih teh fo hi - Laldinpuia