Mizoram-a Bru lolet tawh ten ham\hatna inang phutin Aug. ni 16 thleng sawrkar ngaihchan tum

Tripura-a Bru Camp hrang hrang a\anga Bru lo let, Mamit District khaw hrang hranga awm mekte chuan Tripura Camp hrang hrang 6 a awmte Mizoram-a hruailet turte ham\hatna hmuh tur ang hmuh ve an duh tih sawiin, hemi a hmala turin Equal Package Demand Committee an din nghal bawk.

Zirtawpni khan Tripura Camp hrang hrang a\anga Bru lo let, Mamit district khaw hrang hranga awm mekte chu Bru Coordination Committee huaihawtin Mamit I&PR Conference Hall-ah an inhmukhawm a, tuna Tripura Camp hrang hrang 6 a awmte Mizorama hruai let turte ham\hatna hmuh tur ang (repatriation package thar ber) sawrkarin a siam chu a hmaa Bru chhungkua, Tripura a\anga Mizoram-a lo let tawh zawng zawngte hnenah August 16, 2018 hmaa pe ve vek turin sawrkar an phut thu an sawi a. Bru chhungkua mahni duh thua Tripura camp a\anga Mizoram lo let (self repatriated) ten tun thlenga sawrkarin a tiam ham\hatna a la pek lohte chu a rang lama pe turin sawrkar an phut bawk a ni. He huna kalkhawmte hian sawrkara an thilphutte hi an huntiam chhunga sawrkarin a tihhlawhtlin loh chuan Equal Package Demand Committee huaihawtin lungawilohna lantir an tum a, a \ul dan a zirin Repatriation boycott thlenga hmalak an tum a, he huna Bru kalkhawmte chuan Equal Package Demand Committee dinin Chairman atan Elvis Chorkhy chu an thlang nghal bawk.

Hetihlai hian Mizoram sawrkar-a Home Secretary, Lalnunmawia Chuaungo chuan tun-hnaia Ministry of Home Affairs (MHA), Mizo-ram sawrkar, Tripura sawrkar leh Mizoram Bru Displaced People Forum (MBDPF) ten inremna an ziah angin Tripura Relief Camp-a Mizoram Bru-te hruai kîr hna thawk turin inbuatsaihna an kalpui zel tih a sawi a. Ruahmanna hmasaah chuan Bru hruai kîr hna chu September 30, 2018-ah thawh zawh tur a nih thu sawiin, "Kan ngaihtuah a, September 25-ah zawh ni se kan ti leh a ni. Mahse, Election Commission of India lamin September 27, 2018-ah Final Roll tlangzarh an duh avangin, September 10-ah hruai kîr hna thawk zo turin min ngen a, kan pawmsak ta a ni," a ti a; September 10-ah hruai kir hna thawh zawh ngei an tum thu a sawi.