MGNREGS hlawh la ve theilo te inhmukhawm; Harsatna thlen chhan BDO in sawifiah

Thenzawl khawchhungah MGNREGS hnathawha an thawhna hlawh Bank Account a lut ve theilo te chu niminpiah, Pathianni tlai khan inhmukhawmin an harsatna te chinfel sak turin thuneitute an ngen a. A \ul dan azirin Prime Minister Office-ah thlena hmalak sak tura ngen an tum thu an sawi bawk.

Thenzawl khawchhung VC Area hrang hrang - Thenzawl East, West, North leh Kanan VEC huamchhunga MGNREGS thawhna a an hlawh, chhan engemaw vanga an Bank Account-a lut ve thei rihlo te chu Pathianni tlai khan Thenzawl-a Liantluanga Renthlei te In-ah inhmukhawmin an harsatna tawh mek an sawiho a, an harsatna chu thuneituten hriatpuia, sutkian sak tura ngenin a theih ang anga hmalak a, a \ul anih chuan Prime Minister Office-ah an harsatna te hriattir a, hmalak sak tura ngen an rel bawk. He Meeting hi an Convener, Liantluanga Renthlei chuan kaihruaiin mi 60 vel an kalkhawm a, mirethei leh harsa te te, MGNREGS hnuaia an inhlawhna leh an chanvo dik tak, an thawh hlawh an Bank Account-a lut ve thei rihlo chu mak an tih thu te, thuneitute an phak ang tawka rawn leh zawtfiah an awm tawh thu leh, a rang lama an hlawh te lut ve se an duh thu relin, a theih ang anga hmalak nise, an ti a. Hlawh la lut ve lo te hi chhungkaw 150-200 vel lai an nih an inrin thu leh an Bank Account-a hlawh la lut ve lo te hi Ni 10 thawhna te, Ni 14 thawhna te leh Ni 24 thawhna hlawh te nia an hriat thu an sawi bawk.

Hetihlai hian Serchhip BDO, Lalhmachhuana chuan he harsatna thlen chhan hi sawifiahin kum 2018-2019 Financial Year-ah hian Central sawrkarin July thla thlenga inhlawhna kan neih theih tur zat bithliah (Labour Budget) a rawn siam chu ni 44 a nih laiin tun dinhmunah hian ni 74 inhlawhna siam a ni tawh tih a sawi a. Hetah hian kum hlui 2017-2018 March thla ni 24 inhlawhna pek tel an nih avangin Central a\anga sum min rawn pekin daih lovin khaw tam takah Office lam a\anga hlawh pek tura an siam fel vek tawh Financial Institution-ah tangkhang a awm niin a sawi a. Hei bakah hian Bank account leh Aadhaar link a nih avangin mi pakhat in Account pakhat aia tam a neih chuan a lut diklo thei tih pawh a sawi a. Reilote ah Central sawrkar in pawisa a rawn sanction leh dawn a, central sawrkarin pawisa a rawn sanction leh hunah account felfai pangngai ah chuan a hlawmin a lut turah an ngai tih sawiin, account emaw aadhaar number emaw buai a awm a nih erawh chuan siam \hat a nih phawt loh chuan a la lut thei lo thung ang tih a sawi bawk.