Laldenga thihcham hmang

Inrinni kalta, July 7, 2018 kha MNF Founder President, Laldenga thihcham \um 28-na a ni a, Aizawl Treasury Square-a a Thlan-ah amah zahna pangpar dah a ni.

MNF Founder President, Laldenga Thlan-a Zahna Pangpar dahna hunah hian MNF President, Zoramthanga chuan Laldenga ang mi ropui Pathian in Zofate min pe chu vanneihthlak a tih thu a sawi a. "Pathianin Mizote hi Hnam, sakhua leh ram min pe a, hemi humhalh tlat duhna leh hmangaihna thinlung Pu Laldenga'n Zofate-a a tuh hi a ropui takzet a. Pu Laldenga ang hnam tana miropui, hnam thinlung mipuitea tuhtu hi hnamdang pawhin neih ve an duh a, duh avanga neih ve ngawt theih erawh a ni lo a ni," a ti.

He hunah hian Laldenga (L) nupui, Lalbiakdiki pawhin thu sawiin tun thlenga a pasal in chawimawi ala hlawh chu a fel vang ni lovin Zoram tana a hnathawhte hriatreng a nih vang a nih thu a sawi a, a boral laia an chawimawina te chu Zoram leh hnam tana a hnathawh ve te avanga chawimawina a nih thu a sawi bawk.

Laldenga hi July 11, 1927-ah Lunglei Pukpui khuaah a lo piang a, kum 1944-ah British Indian Army a zawm. Kum 1959-ah Mizo National Famine Front chu a hova din niin, chu pawl chu October 22, 1961-ah Mizo National Front (MNF) tiin thlak a ni a. Laldenga hi kum 1986 khan Mizoram sorkar lailawk (interim)-ah Chief Minister niin, kum 1987-a Mizoram State Assembly inthlan hmasa berah Sateek leh Aizawl North-II bial a\anga thlantlin a ni a, State nih hnua Chief Minister hmasa ber a ni bawk.

Kum 1990 khan Cancer natna a nei tih hriat-chhuah a ni a, Memorial Sloan Kettering Cancer Centre, USA-ah thla thum (3) enkawl a nih hnuin Mizoram pana an haw kawng Ashford Hospital, London-ah July 7, 1990, India sanaa tlai dar 2:30-ah a thi a. A ruang hi July 11, 1990 tlai dar 4:30-ah Tuirial Airfield-ah Helicopter-in phurh thlen a ni a, July 13-ah vui niin, Mizote zinga State funeral-a vui awmchhun a la ni.