Lunglei-a In chim-ah mi 10 in nunna an chan

Nizan hmasa dar 6:40 vel khan Lunglei Lunglawn-a Vanlalpeka In chu an kawmchhak leimin in a hnawl a, mi 10 thiin hliam tuar mi 4 an awm a. Thi zingah hian In neitu Vanlalpeka nupui Lalchawiliani (29) leh a fapa kum 7 mi, a pa HC. Aichianga bakah a nupui nu leh pa te an tel.

Thudawn danin he In hi chhawng hnih niin an kawmchhak leimin in a hnawl hun hi nizan hmasa dar 6:40 bawr vel kha a ni a. He In chhawng chung zawk chu Vanlalpeka te chhungkua member 7 in an luah a, Inhnuai hi Vanlalpeka nupui nu leh pa ten luahin chhungkaw member 7 bawk an ni. He chhiat tawhna hi hriat a nih veleh mi tlawmngaite an tlankhawm a, zankhua in ruang zawn hna thawh niin nizan hmasa dar 12:30 vela Darpawngi (66) ruang hmuh a nih hnuah nimin chawhma dar 11:00 vel khan In neitu Vanlalpeka pa, HC. Aipianga ruang hmuh leh a ni a, leimin in Vanlalpeka In a hnawl vanga boral te hi mi 10 an ni a, an vaiin hmuh vek tawh an ni.

Leimin in a hnawl Vanlalpeka In hi a ban leh chhuat RCC niin, a bang leh a chung Assam type a ni a, kawngpui sir a awm niin, kawngpui thlangah leimin hian a hnawl thla a, an In hnuaia a nupui Lalchawi-liani nu leh pa, Bung-tlang South lam mi te luah a khawsa mi 7 chu an boral vek a ni. Nimin chawhma khan he chhiatna thlenga boral zing ami, Lunglawn-a vui tur nilo, Cindy A. Lalhlunmawii (4), Bungtlang South, Lairammawii (13), Chawnhu, Lawngtlai District, Thatlina (67) H/o Darpawngi, Bungtlang South, Darpawngi (66) w/o Thatlina, Bungtlang South, Remlalfamkima (14), Bungtlang South, Christina Lalnunhrili (10) Chawnhu, Lawngtlai District leh Laldinpari (32), Bungtlang South te chu vui turin an khua ah lak an ni. Boral zing ami Thatlina leh Darpawngi te hi In neitu Vanlalpeka nupui Lalchawiliani nu leh pa te an ni a, In chung leh hnuaiah khawsa mah se, In khat ang mai a awm an ni. Lunglei DC, Dr Ankita Chakravarty IAS chuan vanduaina thlenna hmun hi tlawhin Mizoram sawrkar chuan he vanduaina tawk a boralte ralna turin mi pakhat zel ah Rs. 4,00,000 a ruahman nghal bawk.

**Damchhuak te:

1. Vanlalpeka (30) S/o HC Aipiang

2. Malsawmkima (10) s/o Vanlalpeka

3. Zonunmawii (9) D/o Vanlalpeka

4. Lalduhsaka (15) 

Boral te :  

1) Peter Lalkroschhuanga (7) s/o Vanlalpeka

1) Lalchawiliani (29) w/o Vanlalpeka

2) Cindy A. Lalhlunmawii (4), Bungtlang 'S'  

3) Lairammawii (13), Chawnhu

5) Thatlina (67), Bungtlang S,

6) Darpawngi (66), Bungtlang 'S'

7) Remlalfamkima(14), Bungtlang 'S'

8 ) Christina Lalnunhrili (10), Chawnhu

9) Laldinpari (32), Bungtlang 'S'

10) HC  Aipianga F/o Vanlalpeka