Latest News

ZPM Chief Ministerial Candidate - Lalduhoma


ZPM in nghahna tur chu Isua Krista a ni - Lalduhoma



Zoram Peoples' Movement (ZPM) |angrual Pawl chuan kumin MLA inthlana Chief Ministerial Candidate atan ZNP President Lalduhoma an thlang tih nimin khan an puang a. ZPM Chief Ministerial Candidate, Lalduhoma chuan an in nghahna tur chu Isua Krista a nih thu a sawi.

Zoram Peoples' Movement (ZPM) hian Vawiin khan Aizawl-a Chanmari YMA Hall-ah Chief Ministerial candidate tur puan inkhawm hian buatsaih a, ZPM Chairman Lalliansawta'n he hun hi kaihruaiin, ZPM Val Upa Council (VUC) Chairman, Lalfakzuala'n ZPM Chief Ministerial Candidate tur hi a puang a ni. Lalfakzuala chuan ZPM chuan mipui sawrkar, kalphung thar sawrkar a din dawn tih sawiin, "Pawl leh sawrkar vil tur VUC a nei ringawt pawh hi kalphung thar a ni a, VPC in Chief Ministerial candidate tur a thlang pawh hi kalphung thar tho a ni," a ti.
He hunah hian ZPM Chief Ministerial Candidate, Lalduhoma chuan ram hmasawnna atan ram hausak ringawt a tawk lo tih sawiin, "Ram hausa ah pawh hruaitu an \hat loh chuan mirethei an cheng \hin. Sum neih tam ringawt hi hmasawnna a ni lo. Hruaitu lu ber an pawimawh khawp mai. MLA candidate \ha tak tak awm mah se, an hruaitu lu ber a \hat loh chuan vote loh ngam a ngai," a ti a, hruaitu \ha tehna atan an rorel rei chhung emaw, tlin rei lam ni lovin, an hun chhunga an thil tih a pawimawh thu a sawi a. Politics zinkawng chhuk chho tak zawha vah vaih thu sawiin, "Ka nupui fanaute pawhin an tuar nasa em em a ni. Pathian hian training hautak zet mai min paltlang tir a, rawhtuina meipuiah min paih lut ni ber hian ka hre \hin. Tunah chuan upat lam te pawh kan lo hnaih ve ta der mai. Chuvangin, vawiin ah hian mimal ang pawhin, mipuite lainatna leh khawngaihna ka ngen che u a ni," a ti a, Pathian malsawmna leh mipuite duhsakna zarah ZPM chuan mipuite Super Chief Minister pek an tiam thu a sawi.
Ram hmasawnna atan sawrkar kalphung thar a pawimawh tih sawiin ZNP President ni bawk, Lalduhoma chuan, "Kan kalphung tur chu hruaitute'n an duang tawh. ZPM in nghahna tur chu Isua Krista a ni. Khawvel ramtin maite hian an sakhua chu an Politics lungphumah an hmang \heuh a. India hi Krista ramah siam kan tum a. BJP pawhin India ram hi Hindu ramah siam an tum a, min sawisel thei bik lo ang. Kan sawrkar hun chuan Aizawl khawpui hi 'Biak-in Khawpui (City of Church)' ah kan puang ang," a ti.
Lalduhoma chuan Pathian leh mipui zara sawrkarna an siam a, Chief Minister a ni ve tak tak a nih chuan amah avanga mipuite'n an tawrh a phal ngai dawn loh thu sawiin, "Ram hruaitute bawhchhiatna avang hian ram leilung leh a chhunga cheng mihring leh nungcha te lamin an tuar fo \hin. Keipawh hi mi chak lo, tisual thei ka ni," a ti a, thil a lo tisual palh a nih chuan 'Ka chungah ngei hremna chu thleng rawh se' tih chu a \awng\aina a nih tur thu a sawi.
Zu zawrh chungchangah Lalduhoma chuan, "Sawrkarna kan siam a nih chuan Zu zuar lo turin ZPM Steering Committee-in thutlukna a lo siam tawh a ni. Hnamdang nen intehkhin phak kan la ni lo. Hnamdang angin zu in kan la thiam lo a, Zu zawrh hi kan la tlin lo. Zu zawrh avangin nitin a nuai tel state pawnah a luangral a, economically pawhin kan ram tan a \ha lo," a ti.
He huna thusawitu dang Rev. Dr. K Thanzauva chuan ZPM siam tum ram tharah chuan kalphung thar an ken luh tel dawn thu sawiin, "Kalphung thar chu mipui sorkar a ni ang," a ti a. MPC Vice President, Vanlalhlana chuan pa pahnihin ram an kaihhruai danah mipui an mangang tawh nia sawiin, "Zirlaite pawh ram humhalhna atan an pen chhuah a \ul tawh. MNF leh Congress tel lohna sawrkar siam turin |angrual Pawl a ding a ni," a ti bawk.
ZPM hiana din hnuah District, Block leh Local Level-ah ZPM Steering Committee leh Local approved 76 a nei tawh a ni.

Comments

Popular News (Last 30 Days)