Remna zawnga inbia Mizoram sawrkar leh HPC(D) te’n karleh Thawh\anni khian inremna thuthlung an ziak dawn

Hun engemaw chen Mizoram sawrkar leh HPC (D) ten remna zawnga inbiakna an neih hnuah karleh Thawh\anni khian inremna thuthlung an ziak dawn tih Chief Minister, Lal Thanhawla chuan sawiin, Mizoram sawrkar aiawhin Chief Secretary in hming a ziak ang.

Chief Minister, Lal Thanhawla hian Ningani khan Assembly Budget Session-ah a Department chan hrang hrang enkawlna tura sum ruahman sawihona khaikhawmna ah Mizoram sawrkar leh Hmar People Convention (Democratic) ten inremna an ziah tur thu hi a sawi a. Chief Minister, Lal Thanhawla chuan HPC (D) leh sawrkar chu nasa takin inkap \hin lo mah se, hun rei tak ata tawh an inngihrirngho reng a, HPC (D) te hian tihluihnaa chiah te khawnin mipui an rikrap \hin a, mipuiin harsatna nasa tak an tawk \hin tih a sawi a. Hun eng emawti kaltaah khan sawrkar leh HPC (D) te hian inremna an lo nei tawh tih pawh sawiin, “An ralthuamte pawh Sesawng-ah an tung a, mahse hemi \um hian ralthuam tak tak pakhat mah an tung tel lova; pipe chhia hlir an rawn ‘surrender’ a ni,” Chief Minister chuan a ti.

Chief Minister chuan tun \umah erawh hi chuan inrem duhin sawrkar aiawhte nen \ha-hnemngai takin an inbia tihsawiin, tunah hian inrem turin engkim tihfel a ni tawh a, karleh Thawh\anni, Easter Monday-ah inremna an ziak dawn a, Mizoram sawrkar aiawhin Chief Secretary-in hming a ziak ang, a ti bawk.

Remna kawng zawnga Mizoram sawrkar leh HPC (D) hel pawl inbiakna hi August ni 10, 2016 a\ang khan neih \an a lo ni tawh a, inbiakna hnuhnun ber leh Political Level-a inbiakna hmasa ber tun thla ni 7 leh ni 8-a neihah khan 'Sinlung Hills Development Council' chu a hming thlaka 'Sinlung Hills Council' tih zawk ni se tia rawtna a awm a. Thuneihna sang zawk pek leh inthlanna neih dan turte pawh duan a ni a. Hei hi Assembly-a dan siam tura la putluh tur a ni anga. Inremna thuthlung ziah hnu hian HPC (D) mite’n an ralthuampawh an tung nghal tura ngaih a ni.