Latest News

PWNM kum 10 tlin lawmna Health Minister in hmanpui

Positive Women Network of Mizoram (PWNM) ten kum 10 an tlin lawmna chu nimin khan Whitestone Conference Hall, Ramhlun North-ah Health Minister, Lal Thanzara hovin neih a ni.
Positive Women Network of Mizoram (PWNM) kum tlin lawmna hunah hian Health Minister chuan Mizoram chhunga HIV/AIDS dona kawngah a natna vei ngei ten pawl anga intelkhawm a, hmuhsitna leh endawngna hmachhawn ngama kum 10 lai PWNM in hna an lo thawh tawhna chu chhuanawm a tih thu a sawi a. Midangte tana an hnathawh chuan mi tam tak tan HIV/AIDS natna a pumpelh tir ngei a beisei thu sawiin, HIV/AIDS natna chu kan hmelhriatna ala reilo chungin a darh nasa tawh hle a ni, a ti.
Health Minister chuan Sorkar, Kohhran leh pawl hrang hrangin he natna veite enkawlna kawngah leh an hmakhua ngaihtuahna kawngah nasa takin hma an la vek tih sawiin, heti chung hian a darh zau zel thu leh nasa zawka hmala in kan thawhho tlan a ngai tih a sawi a. HIV hrik paite tana enkawlna leh a thlawna damdawi sem chhuahna chu ART (Anti Retroviral Therapy) Centre kaltlanga tih \hin a nih thu sawiin, India rama a vawikhatna leh a bul\anna atan ART damdawi te sorkar damdawi In chauha semchhuah \hin chu PWNM a\angin pekchhuah tura ruahmanna a awm chu lawmawm a tih thu a sawi bawk.
Positive Women Network of Mizoram (PWNM) hi kum 2007 khan din niin tun dinhmunah hian member 4000 vel an awm mek a. HIV/ADIS natna kawng hrang hranga kai mi 40 vel in PWNM hi an din a. PWNM-in a tum chu – HIV/AIDS vei tawh ten nun pangngai tak an neih theihna atana hmalak te; HIV/AIDS veite chunga thinhrikna leh endawngna tih tlem te leh Natna darh zau zel tur ven tih te a ni.

Comments

Popular News (Last 30 Days)