Mizoram RD Block pathum-a SHG te hman turin AGEY hnuaiah lirthei 18 vailiam a ni

Rural Development Department in a kalpui mek Mizoram State Rural Livelihoods Mission (MzSRLM) hnuaia Scheme pakhat Aajeevika Grameen Express Yojana (AGEY) a\angin Mizoram-a RD Block pathum-a lirthei hman tur 18 chu nimin khan Aizawl a\angin vailiam a ni.

Aajeevika Grameen Express Yojana (AGEY) hnuaiah lei lirthei 18 te hi RD Block pathum Bilkhawthlir, Serchhip leh Tipa-a Self Help Group (SHG) te hman tur niin heng lirthei te hi Rural Development Minister, R. Lalzirliana chuan Aizawl a\angin a vailiam a. He hunah hian RD Minister chuan retheihna ata penchhuaka mahni thiamthil leh theihzawng thawka eizawng tura duan Self Help Group te’n an eizawnna leh an hmalakna pui thei tura lirthei an dawng chu a lawmpui thu sawiin, lirthei dawng thei tura thlanchhuah Self Help Group te chu uluk tak leh fimkhur taka an lirthei dawn te hmang turin a chah a. Sum lakluh dan leh a hman kawngah rinawm tur leh an lirthei dawn te innghirngho nan nilo a, inlungrual taka hma an lak chhunzawmna a nih ngei a beisei thu a sawiin, tluang taka an hman theih nan duhsakna a hlan a. Self Help Group te hmasawn zel tur a fuihin, teirei peihna leh taimakna nena hmala chho zel turin a fuih a ni.

Lirthei hlanna leh vailiam inkhawm hi RD Secretary, Lalhmingthanga chuan kaihruaiin H. Lalchhandami, Chief Executive Officer, MzSRLM in lirthei semchhuah chungchang leh AGEY hnuaia hmalakna te a tarlang a. Nimin a lirthei semchhuah hi Bolero Pick up 13 leh Sumo 5 a ni. 

Aajeevika Grameen Express Yojana (AGEY) in a tum ber chu thingtlang a awm Self Help Group (SHG) member te sum lakluhna hmanrua tur leh khaw mipui ten \angkai taka Bazar, Zirna In leh damdawi In kalna atana hman tur leh khawchheh vel ei leh bar hmasawnna thlen theitu tur lirthei ruahman sak a ni a. He programme hnuaiah hian MzSRLM a\anga Village Organisation (VO) te hnena sum pek, Community Investment Fund (CIF) hmangin SHG-te lirthei lei sak an ni a, pung awm lovin SHG te hian lirthei man hi VO-ah kum ruk chhungin an rul leh ang. SHG ten an khaw mamawh ang zawng leh lirthei an duh ang zawng an thlang a, lirthei thlan theih te hi Rickshaw, 3-Wheeler leh 4 Wheeler te a ni a. Lirthei pakhat lei nan VO-te CIF a\angin Rs. 6,50,000/- hman theih niin, a aia to an lei duh chuan sum puk belh phalsak an ni bawk. Tun dinhmunah hian MzSRLM hnuaiah Self Help Group (SHG) 2980 leh Village Organisation 157 din tawh niin, District paruk (6) hnuaiah RD Block 17-ah MzSRLM hian hna chak takin a kalpui mek a ni.