Sports & Youth Services hmalakna in Mizoram-ah thisen pek runpui neih tan a ni

Sports & Youth Services Department huaihawtin Sports discipline hrang hrang leh Youth Services leh Mizoram State Sports Council hmangin thisen pek runpui ‘Voluntary Blood Donation Drive’ chu nimin khan neih \an niin naktuk thleng chhunzawm a ni ang.

Sports & Youth Services Department huaihawta Sports discipline hrang hrang leh Youth Services- Scouts & Guides, Adventure, NCC, NSS, NYK, YHAI leh Mizoram State Sports Council hmanga thisen pek runpui ‘Voluntary Blood Donation Drive’ hi Mizoram district zawng zawngah tunkar Zirtawpni thleng khian neih ni dawn a. He thisen pek runpui neih tur hi nimin khan School Education Minister leh Vice President, Scouts & Guides Mizoram, H. Rohluna chuan Aizawl Civil Hospital-ah a hawng a. Minister chuan Sports discipline hrang hrang leh Youth Services kaltlangin mamawhte tan thisen an pek tur chu lawmawm a tih thu sawiin, midangte tana malsawmna thlentu nih chu Mizo nun zemawi leh Kristian nun nen pawh a inmil hle a ni, a ti a. Mizo \halai tam tak ruihtheih thil tih vanga thisen pe ve thei lo an awm tih sawiin, ruihtheih thil an khawih avanga natna hrang hrang kai a, midangte tan thisen pe thei lote pawhin an nun siam\hat nachang hria a, an vanglai hun an hman mekah midangte tan malsawmna ni ve thei turin a fuih bawk.

He hunah hian Aizawl Civil Hospital Medical Superintendent, Dr. KL.Remsanga pawhin thu sawiin thisen mamawhna a sang zel ang bawkin a petu lam pawh an \hahnem zel tih a sawi a. Mihring taksa hian thisen 4-5 litres a mamawh a, thisen Unit 1 hi 350ml ang a ni a, chu chu darkar 24 chhungin a insiam thar leh hman vek a ni tih a sawi a. Thisen pek hian heart attack leh stroke lakah min ven bakah cholesterol (thau chhia) a tihniam bawk a, thisen Unit 1 pekin 650 calories a paih chhuak zel bawk a ni, a ti. Kum 18 a\anga 80 inkar hi mihring in a duh chuan thisen a pe thei reng a, mi 1 hian a damchhung hian vawi 168 a pe thei a ni tih a tarlang bawk. Midang nun chhan nana thisen pek hian mahni nun pawh chhan theih a nih thu sawiin Dr. Remsanga chuan, thisen pe reng rengte chu an thisen endik zel a ni a, natna hrang hrang - HIV, Syphyllis, Hepatitis, Malaria leh a dangte an vei leh vei loh hmuhchhuah a niin enkawl theih nghal an nih thu a sawi bawk.

Nimin a \an tak thisen pek runpui hi Aizawl-ah chuan nimin a\anga ni thum chhung neih a ni anga, Vawiin-ah Lunglei, Lawngtlai, Serchhip leh Champhai-ah neiin naktuk, Zirtawpni khian Siaha, Mamit leh Kolasib-ah neih a ni bawk ang.