Latest News

Mizoram sorkar leh Lalhmingthanga kaihhruai HPC (D) inbiak tumna a tlawlh ta

Mizoram sorkar-in Lalhmingthanga Sanate kaihhruai HPC (D) nena August thla chawhnu lama inbe tura ruahmanna chu a tlawlh ta a, Lalhmingthanga hote hian inbiakna atana thu delhkilh an neih chu sorkarin a pawm saklo nia thudawn a ni.

Home Department hotute hnen a\anga thudawn danin Mizoram sorkar leh H. Zosangbera kaihhruai HPC (D) te inbiakna kal mekah ‘Lalhmingthanga pawlte hi biak tel ve a, inremna kawng zawnpui ve nise’ ti a thutlukna siam a ni a. Aizawl-a inbe tura ruahmanna pawh siamin a ni tak tur an la bithliah lova. Lalhmingthanga kaihhruai HPC (D) te hian inbiakna neih hma hian Autonomous District Council hrang an ngiat bakah inbiakna-ah hian sorkar laipui aiawh tel ve-in kil thuma inbiak an duh thu sorkar hnenah an thlen a. Mizoram sorkar chuan Autonomous District Council hrang siam tum a nih loh thu leh inbiak an duh chuan engmah thu delhkilh awm lo ni se tiin an hriattir a. An thu delhkilhte an hnuhdawh duh tak loh avangin Lalhmingthanga pawl nena inbe tura ruahmanna chu \hulh a ni ta a ni.
Hetihlai hian H. Zosangbera kaihhruai HPC (D) nena inbiak lehna hun tur chu tunhnai-ah bithliah fel a nih tur thu Home Department hotute chuan an sawi a. Thui tak inbiakna a kal tawh avangin tun \um hi Official level-a inbiakna hnuhnung ber a nih tawh an rin thu an sawi a. A dawt leh a\ang chuan inbiakna hi Political level-ah hlankai a nih rin a ni a, inbiakna hmawr awk thuaiin inremna thuthlung ziah thuai a nih an besei thu an sawi a. Inbiakna lo awm tawhah te boruak \ha tak hnuaiah inrintawnna nen an inbe \hin niin an sawi.
HPC (D) hi kum 1994 July thla a Mizo-ram sorkar leh HPC te'n inremna an ziah hnu lawkah inremna thuthlunga lungawi lovin Lalhming-thanga Sinate hian a din a. Hun engemawchen a kaihhruai hnuah Kuki hel pawlte nen inkawpa sorkar nen inkahhai an lo puan avangin an pawl hi a phel a, H. Zosangbera pawl leh Lalhmingthanga Sinate pawl angin an kal zui ta a. Heta an inhriat-thiam lohna chhan hi an President Lalhmingthanga'n thutlukna a siam dawna an hruaitu dangte a rawn loh leh hriattir veloh vang nia hriat a ni. H. Zosangbera kaihhruaite hi Manipur-ah an awm a, Lalhmingthanga pawlte erawh chu Mizoram ramri hnaih Assam chhungah an chetla thung nia thudawn a ni. 

Comments

Popular News (Last 30 Days)