Vengchung-ah In pakhat kangral

May 31, 2017 zing dar 5:30 vel khan Serchhip Vengchung-a Laltlanzovi chenna In chu bungrua engmah chuh hman lohin a kang a, vanneihthlak takin mihring thi leh hliam erawh an awmlo thung.

Laltlanzovi hi a fate 3 nen Serchhip Vengchung, Veng lu lamah an In, Assam Type-ah hian khawsa \hinin tunah hian a fa pakhat chu Aizawl-ah awmin pakhat chu Eklavya Model Residential School-ah lutin a fa pakhat nen hian an khawsa mek a, May 30 khan Laltlanzovi leh a fa hi dawr-a thil lei tura kalin, ruah a sur zui tak avang leh thli a thawt nasa avangin an In-ah hian haw lovin Vengchung vek-a an chhungte In-ah chaw te eiin an riak nghal a, nimin zing dar 5:30 vel khan an \henawma awm te chuan In kang hi hmuin, khaw-tlang-a mi tlawmngai ten \helh tumin bei nghal mah se kangmei hi alo nasat hman avangin \helh theih a ni ta lo a ni.

He In kan lai hian In-ah tumah an awmloh avangin kangmei chhuah chhan hi chiang taka hriat theih a ni lova, In neitu Laltlanzovi chuan a In-ah hian Ar note an vulh thu sawiin, heta electric an pekna a\anga in\an nia a rin thu a sawi a, bungrua an neih zawng zawng a kangral vek tih sawiin, heng zingah hian TV, Washing Machine, Tuizem (Sintex), Steel Almirah leh bungraw dang chi hrang hrang a tel a, bungraw kangchhia hi cheng nuai 2 hu vel nia chhut a ni.

In kan Ni vek khan Serchhip-I VC chuan khawtlang huap hnatlang koin In kang bang te senghawi hna thawh hnatlang an nei nghal a, kangmei tuar te chenna tur In sak zui niin mi 100 chuang zet an thawkchhuak a, kangmei tuar te chenna tur In hi a dung ft. 24 leh a vang ft. 15-a liana sak nghal niin mi tlawmngai ten thingzai leh hmanrua chi hrang hrang an thawhkhawm a, bialtu MLA leh Chief Minister ni bawk, Lal Thanhawla chuan Serchhip Block Congress Committee hruaitute kaltlangin In chung tur Rangva bundle 4 a rawn tum tur thu sawiin, an mamawh ang Perek pawh a tum tur thu a sawi bawk.