Tun thla tawp lamah Scholarship pekchhuah hman beisei a ni

Nimin khan MZP General Hqrs. hruaitute leh Mizoram Scholarship Board Secretary, JH. Zoremthanga te chuan Mizoram Scholarship Board Office-ah inkawmna neiin Zirlaite Scholarship chungchang sawihona neih a ni.

MZP thuchhuah in a tarlan danin Post Matric Tribal Scholarship hi Central a\angin sanction hmuh ni tawh mahse Mizoram sorkarah pawisa a lo la thleng rih lova, a lo thlen thuai beisei niin Zirlaite hnenah Scho-larship hi tun thla April, 2017 tawp lam chuan pekchhuah hman beisei a ni. Scholarship hi direct-a zirlaite account a thun tur a nih avangin Zirlai scholarship dil zawng zawngte mahni account te lo ti nung a, lo ti che turin an ngen a, Zirlaite scholarship dilna-ah kim lo leh diklo nei an la awm chuan application form kengin Mizoram Scholarship Board ah zawhfiah theih reng a nih thu an tarlang.

MZP chuan Central sorkar in a taka Mizo-ram sorkar-ah sum a rawn pek rual rual in a rang thei ang ber a zirlaite hnenah Scholarship sem-chhuah anih theih nan hma a la dawn tih sawiin, Mizoram sorkar sum khawihtu department te sum hi a luh hun hunah Scholarship Board thu-neitute hnena sum sem mai theih tura a awm vat theih nan chak taka hma lak sak turin an ngen nghal bawk.

Hei bakah hian MZP chuan kum 2014-2017 chhunga IGNOU hnuaia Scholarship leh Fee Re-imbursement pawisa la dawng lo ten Mizo-ram Scholarship Board Office, Ramhlun North, Aizawl-ah ngaihven tur a ni tih an tarlang bawk.