Mizoram Merchant Association (MIMA) in ‘Thingserh sah’ an tum thu an sawi

Mizoram Merchant Association (MIMA) te chuan Inrinni khan Aizawl Press Club-ah thuthar lakhawmtu te kawmin an hmalakna hrang hrangte an tarlang a, tunkar Nilaini hian khawmpui neiin ‘Thingserh sah’ an tum tih an sawi.

MIMA hruaitute chuan Mizo hnam chu hnam lian zawk ten an chimral lohna tura hma an lakna kawngah mi \henkhatten MIMA hmalak tum lohna zawnga kailekin mipuite diklo zawngin an thlirtir thu leh pawi an tih thu an sawi a. Vishal Mega Mart chu hnamdang sumdawngte lo luhna bul\anna leh kawng hawnna a nih dawn avanga duhlo an nih thu sawiin, tuna Vishal Mega Mart-in Mizoram-a sumdawnna a rawn bun danah thil dik tawk lo hmuhchhuah zel a nih avangin MIMA chuan duhlohna a la lantir zel dawn niin an sawi bawk. AMC Licensing hnuaiah Lalrinmawia (LRM) hmingin Vishal Mega Mart chu April 28, 2016 daih tawh khan Shop Licence pek a nih thu MIMA hruaitute chuan an sawi a. Hetihlai hian VAT registration-ah chuan AIRPLAZA HOLDING Pvt. Ltd. hmingin February 21, 2017-ah Aizawl North Zone Taxation Department a\angin pek a nih thu an sawi bawk.

MIMA hruaitute chuan District Council hunlaia Trade Licence lo pek tawh tih loh chu, purpose of visit-ah business a ni a, kum 2 dam ILP nei chuan Trade Licence an dil thei ang tih anih thu an sawi a, hetihlai hian February 28, 2017-ah kum 2 dam ILP chu Rasjesh Mishra hnenah pek a nih laiin kum hnih dam ILP a neih hma ni 7, Feb. 28, 2017-ah MVAT Registration hi AIRPLAZA RETAIL HOLDING Pvt. Ltd. hminga pek a nih thu sawiin, he thilah hian thil diklo a inphum ngei tih chu MIMA rin dan a nih thu an sawi bawk. 

MIMA hruaitute chuan Big Bazaar leh Bazar India te lo luh an tum tih sawiin, “Hun reilote ah Sairang-ah rel a lo lut anga, sumdawng lian pui pui an lo luh zel chuan kan Kristianna thlengin a la khawih dawn a ni,” an ti a. Bazar India building tura buatsaih mek in neitu Biakchungnunga, Chaltlang North chu MIMA ten an dawr tih sawiin, an indawrna avangin hawn loh tum a nih thu MIMA hruaitute chuan an sawi bawk. MIMA hruaitute chuan Home Department Secretariat a an len \uma “Sorkar in tax a duh si a, Big Bazaar te, Bazar India te pawh hian kum hnih dam ILP hi rawn dil se, kan pek kan ring,” tia chhanna an dawng chu pawi an tih thu pawh sawiin, Opposition party tinte an ngawi tih sawiin, MZP leh CYMA hmalakna chu an fak thu an sawi bawk.