YMA in thisen pe; Thisen man chawi ngailo

Serchhip Chanmari Branch YMA chuan nimin Jan. 28, 2015 khan JN Hospital Serchhip Blood Bank-a dah turin thisen Unit 12 an pe a, hetihlai hian sorkar in thisen dawng turte hnena Processing Fee, thisen Unit khat (1) ah Rs. 550/- la tura a tih chu a taka kalpui ala ni lo.

Serchhip Chanmari Branch YMA hian kumin a an Branch project-a JN Hospital Serchhip Blood bank-a thisen Unit 50 tal pek chu telhin a thawh khatna atan nimin khan thisen hi an pe a, thisen petute hi Mipa 11 leh hmeichhia 1 niin tlawmngaia thisen pe turte hi Blood Bank-ah kalin thawktu ten an thisen hi an lak sak a, kumin chhungin a remchan dan anga a tahtawla an pek chhunzawm zel an tum a ni. JN Hospital Serchhip Blood Bank hian hun engemaw chen kalta a\ang khan tlawmngaia thisen pe te ei leh in tur buatsaihna tur hi an dawn tawh loh avang leh Blood Bag harsatna a ziaawm hnuah thisen enfiahna hmanrua an duh khawp an hmuh theih loh avangin Blood Donation Camp hi an buatsaih mumal thei tawhlo a. Nimin a Blood Donation Camp neih hi kumin a a vawikhatna niin Serchhip Chanmari Branch YMA ten Blood Donation Camp an buatsaiha tlawmngaia thisen pe te ei leh in tur pawh hi Branch YMA in a tum a ni. Hetihlai hian sorkar in damlo thisen mamawh ten thisen an dawn dawna thisen sawngbawlna man, thisen Unit 1-a Rs. 550/- zel la tura a tih chu Serchhip damdawi In Blood Bank ah hian a taka kalpui ala nilo tih Blood bank-a thawk te chuan sawiin, thisen hi a thlawnin an pechhuak reng tih an sawi bawk.