MSU in PWD Act a nihna anga hmang turin sorkar phut.

Mizo Student Union (MSU) chuan, The Persons With Disabilities Equal Opportunities Protection of Right and Full Participation Act 1995 (PWD Act) chu a nihna ang taka hmang turin Mizoram sorkar an phut.

MSU hruaitute hian nimin April 21, 2014 khan Aizawl Press Club-ah thuthar thehdarhtute an kawm a. Sorkar hna leh zirnaina rualbanlote tana hmun hauhsak chu mi pangngai zingah chuhpuitu an awm nia sawiin, pawi an tih thu an sawi a, rualbanlote chanvo chuhpui tawh lo turin mi tin an chah. MSU President Zodinpuia chuan PWD Act-in rualbanlo a tih chu taksaa rualbanlohna 40% a ni a, mahse Mizoram sorkar hnuaia hna lak \henkhatah doctor tute emaw lehkha ziahtira rualbanlote chanvo chuhpui leh sorkar hnaa lut ta an awm nual a ni, a ti a. “Doctor tuin emaw rualbanlohna Certificate a pechhuak thiang lo a, a pechhuak thei chu sorkarin a ruat Medical Board a ni a. Medical Board ah hian member pathum aia tlem lo an awm tur a ni a, an zingah Mit, Phar, Beng leh thahrui leh rilru a rualbanlo lama mithiam an tel ngei tur a ni,” a ti a. Mizoram sorkarin Group A leh B a rualbanlote hnathawh theih tur bik a siam chu PWD Act 1995 leh sorkar laipuia Social Justice & Empowerment-in gazette a siam zulzuia siamthat an phut thu a sawi bawk.
    Hei bakah hian MSU President chuan an thilphut dangte chu UPSC kal dan angin, MPSC-ah pawh exam hrang hrangah mitdel leh ke khing hnih \halote exam phalsak te, Supreme Court in rualbanlote tana Back Low Vacancy post hnawhkhat tura Central leh state sorkar zawng zawng a hriattir chu a taka Mizorama hman te, Poverty Alleviation Scheme hrang hrang hengah rualbanlote tan 3% hauhsak te a ni tih a sawi a. Mitdel chunga MA zo tawh, K Lalhmingsanga chuan rualbanlo quota hmangin MPSC Combined Examination beih ve a tum a, mahse a application hnawl a ni a, General Candidate anga beih a tum pawhin an phal lo nia sawiin, a chhan MPSC hotu pakhat a zawhfiah chuan rualbanlote tan group C leh D bak a thawh theih loh tih a lo hrilh niin a sawi a. K. Lalhmingsanga chuan rualbanlote chanvo tur chu mi pangngai a\angin chuhpuitu leh chhuhsaktu, certificate lem hmang an awm \hin tih sawiin, Rualbanlote'n rual ban tumin kan bei hram hram a, rual ban sate'n ham\hatna duh vanga rualbanlote chanvo an chuh hi Pathian pawi sawina a ni, a ti bawk.