PYD (NEI) General Conrence nei
UPC North East India Pentecostal Youth Department General Conference hi Zirtawpni zan atang khan Thenzawl-a Rajput Field-ah neih niin thupui atan ‘Thih thlengin rinawmin lo awm rawh’ tih chu hman a ni a, nimin Pathianni chawhma Inkhawm-ah General Superintendent, Rev. Zohmingthanzama chuan thupui hmang hian thuchah a sawi a, chawhnu lamah Praise and Worship a hun hman niin nizan inkhawm ah Rev. C. Lalmalsawma, President General PYD in thupui hmangin thuchah a sawi bawk a. Hemi hma Inrinni khan Thenzawl Field Veng UPC Biak In-ah rorel Inkhawm neih a ni bawk.
Nimin chawhma lama Inkhawm hi Bialtu MLA leh Chief Minister Lalduhoma pawhin a hmanpui a, khawmpui Palai te chu Chibai bukin Inkhawmpui dawng tura Thenzawl khawtlang mipuite tanrualna, pawl hrang sawi lova an thawhho thinna ah lawmthu a sawi a. Thenzawl khua chu ‘Muanna khawpui’ ni tura ruahman mek a nih thu leh hmalakna liantham kalpui mek te tarlangin, Thenzawl khawpui chu Mizoram a khawpui mawi ber leh pawimawh berte zing ami ni turin buatsaih mek a nih thu a sawi bawk a. Chief Minster chuan heng inbuatsaihna te hi Pathian tel lo chuan a thlawn dawn tih sawiin, Pathian ropuina puanchhuahna hmanrua a nih theih theih nan duhsakna a hlan a ni.
PYD (NEI)-ah hian member 29,000 chuang an awm mek a, North East India hnuaia District 12 - Aizawl East, Barak, Central, Chandel, Chhimtuipui, Churachandpur, Imphal, Lawngtlai West, Lunglei, North Mizoram, South East Nagaland leh Tuichang atangin PYD member 4,500 chuang khawmpui hmang tur hian an kal a ni.