Tun thla chhungin Covid hri kai hmuh an awm lo

Kumin October thla chhung hian Mizoram-ah Covid-19 hri kai leh kai lo hriat nan inringhlel mi engemawzat sample endik a ni chungin hri kai hmuh a awm lo. Health Department hnuaia Integrated Disease Surveillance Programme (IDSP) a thawkte sawi danin kumin January atanga Inrinni kalta, Oct. 18, 2026 thleng khan Covid-19 hri kai inringhlel mi 1,274 sample endik a ni a, an zinga mi 155-te chuan he hri hi an kai tih hmuhchhuah a ni a, tun thla ni 6 a hri kai enkawl dam tak kha hri kai awm hnuhnung ber a ni. IDSP chhinchhiah dan chuan kum 2020-a Covid-19 hri a len tan atanga tun thleng hian hri kai rinhlelh mi 19,99,467-te sample endik a ni a, an zinga mi 2,39,830-in hri an kai tih hmuhchhuah a ni a. Covid-19 avanga nunna chan mi 734 an awm tawh a, June 22, 2023-a Aizawl Upper Republic Veng-a Covid-19 hri kai thi an awm hnuah hri kai thi hi an la awm leh lo a ni.