Naga zirlai ten Freshers’ Meet leh Cultural Day hmang

Naga Students’ Union, Mizoram (NSUM) chuan nimin khan Beraw-tlang-a Art & Culture Auditorium-ah Freshers’ Meet-cum-Cultural Day vawi 28-na hmangin Adviser to Chief Minister Dr. K.C. Lalmalsawmzauva chuan khuallian niin a hmanpui a ni.

Nimin-a he hun hman ah hian Adviser to Chief Minister chuan Zirlaite chu an thil tumah chiang tur leh, chu an tum ram thleng tura ruahmanna siam leh inbuatsaih a pawimawh thu a sawi a. A lehkha zirlai-a a thil tawn te sawiin, zirlaite chu hlawhtlinna atang chauh ni lovin, hlawhchhamna atang pawhin zir tur tam tak a awm tih hre turin a chah a. Kum 10 a ral hnuah eng ang mi nge nih an duh, eng hna nge thawh an tum, eng ang chhungkua nge din an tum tih thlenga ngaihtuah chiang turin a fuih a. Hma lam hunah mawhphurhna la ngam, mi puitling ni turin a fuih bawk a ni.

He hunah hian NSUM President Eno Kelengulie Kenguruse chuan inlawmna thu sawiin, Khual Zahawm nia he hun hmanpuitu PS to Supply Minister, Remlalliana Hnamte chuan thu a sawi bakah NSUM Vice President Eli Rebeka Lohe chuan presentation a pe a. Central YMA aiawhin Lalnunfela Hlawndo, Executive Committee Member in thu a sawi bawk a. Naga Christian Fellowship Pastor Imtinungit Lemtur chuan freshers-te tana tawngtai hun a hmang bawk a ni.