MUHCS-a indawr tum dan eirukna kawngkhar hawnna ah ngai

Mizoram Pradesh Congress Committee (MPCC) chuan Health Minister in ‘MUHCS chungchangah Pawl an dawr tawh dawn lo a, damdawi In mal zelin an dawr tawh dawn’ tih a sawi chu eirukna kawngkhar inhawn theihna niin an sawi.

Nimin-a Aizawl Press Club-a thuthar thehdarhtute an kawmna-ah MPCC Spokesperson Dr Lallianchhunga chuan Mizoram pawna Private Hospital te awlsam tak leh Rate tha taka MUHCS hnuaiah inremna ZPM sawrkarin a ziahpui theih laiin, mahni ram ngeia Private Hospital tha tak tak te nen inremna kawng zawng lovin a tikhawtlai ngar ngar niin a sawi a. Mizoram pawna damdawi In te a mal te te a dawr a, Rate sang an pawmpui dungzuia kalpui an tum chu eirukna kawngkhar inhawn theihna nia an hriat thu sawiin, damdawi In mal ang chuan inremna mantang, puanhnuai thil inpek ruk theihna remchang a awm thei dawn nia an hriat thu a sawi a ni.

Dr. Lallianchhunga chuan MUHCS chu a hmang pha lo leh hmang thei lo chhungkaw tam tak ten an hman ve theih ngeina turin huapzo taka thutlukna siam turin sawrkar an phut tih a sawi a, chhungkaw tam takin an hman theih loh chu Health Care System tha niin an ngai thei lo tih a sawi bawk a. Mizoram chhung MUHCS Empanelled Hospital a khum chang lo tam tak Private Hospital-a enkawl ngai engemaw zat an awm reng tih sawiin, MUHCS sum chu mipui pawisa anih avangin rorelna dik an phut tlat tih a sawi bawk a ni.