Eizawnna atana Kuhva huan siam duhte tan Sawrkarin kawng a hawng mek - Chief Minister
Nimin khan Aizawl-a Vanapa Hall-ah kuhva chingtute tan kuhva chin chungchang zirhona, ‘Training cum Seminar on the Scientific Cultivation of Arecanut and Pest Management’ neih niin he hun hi Chief Minister chuan hmanpuiin kuhva chu kum 2019 atanga khan Land Resources, Soil & Water Conservation Department kutah sawrkarin a dah thu a sawi a, Department chhinchhiah danin Mizoram pumah kuhva huan hi Hectare 67,380 vel a zau a awm mek thu leh nikum 2025-2026 chhung khan Mizoram puma kuhva tharchhuah zat chu quintal 5,12,000 vel nia chhut a nih thu sawiin, India rama kuhva thar tam lamah pangana dinhmun Mizoramin a luah thei chu lawmawm a tih thu a sawi a, eizawnna atana Kuhva huan siam duhte tan Sawrkarin kawng a hawng mek tih sawiin, “Bana kaih Handholding Scheme leh CM Special Package hnuaiahte dilna thehluh theih reng a ni,” a ti.
Kum 2021 vel atang khan vanduaithlak takin Kuhva chu Tam hriin a man tan tih hriat a nih thu pawh Chief Minister chuan sawiin, “Kuhva natna hi LRS & WC Department-a thawktute leh Directorate of Arecanut and Spices Development, Ministry of Agriculture & Farmer’s Welfare atanga lo kal Scientist rualte nen a hmunah kalchilhin zirchianna neih a ni tawh a. Tunah hian mithiam lo kal ten he kuhva Tam chhan zirchianna report leh a enkawl zui dan tura rawtnate an buaipui mek,” tiin an report hi Union Agriculture Minister hnenah an thehluh dawn thu leh Mizoram Sawrkar chuan Central Ministry atangin beiseina a nei sang hle tih te pawh Chief Minister chuan a sawi a ni.
Kuhva leh Cocoa chinpawlh (intercropping) dan kawng an dap mek thu pawh Chief Minister chuan sawiin, ICAR-Central Plantation Crops Research Institute leh Land Resources, Soil & Water Conservation Department te chuan indawrna an nei chho mek tih a sawi a. Kuhva chingtute chuan duat taka an kuhva kungte an enkawl a tul a, mithiam zawkte zirtirna leh thurawn te an ngaihthlaka an zawm a pawimawh avangin hetiang Training hi buatsaih a nih thu a sawi a. Kuhva chingtuten kuhva huan enkawlna tur mamawh hrang hrang an nei tih sawrkarin a hriatpui thu pawh sawiin, “Kuhva Tam enkawlna tur damdawite, fertilizer-te, tuizem-te, pipe leh link road-te an mamawh a, hengte hi sawrkar-in a tahtawlin a ngaihtuah zel a ni,” a ti a. Tunah hian LRS&WC Department hnuaia thlai bik heng Kuhva, Rubber leh Hmunphiah huan panna kawng (link road) siamna tur NABARD leh SASCI sum cheng vbc. 27.66 hmuh tawh a ni a, a vaiin km 170 a thui link road hmun hran hranah laih tura ruahman a ni,” a ti bawk.
LRS&WC Minister Lalthansanga pawhin kuthnathawktute chu sawrkar VIP te an ni tih sawiin, an thawhrah an seng theih nan sawkarin theihtawp a chhuah thin thu a sawi a. Kuhva chingtute chuan mahni hriat dana kuhva chin an kalpui thin avangin harsatna an tawk thin tih sawiin, tunlai thiamna hmanga kalpui a nih theih nan tan an la mek tih a sawi bawk.
Nimin-a Training-ah hian LRS&WC Joint Secretary Mark Lalthanliana chuan inlawmna thu a sawi a, mimal-a kuhva thar tam- Lallawmthanga Ralte, Mamit District leh B. Lalnuntluanga, Kolasib District te hnenah lawmpuina hlan a ni a, chawhnu lamah mithiam hrang hrang ten kuhva chin leh a enkawl kawnga hmalak dan tur hrang hrangte thawktute chu an zirtir bawk a. Hetiang Training hi October 23 khian Lunglei ah buatsaih leh tum a ni bawk.