Aizawl By-pass on Western Side laih mek tlawh
Union Minister Majumdar hian Sihhmui-a Base Camp tlawh hmasain PWD Official te leh Contractorte nen inkawmin kawng laih hna hi January 2028-a thawh zawh tur a nih thu an lo hrilh a, Minister hian huntiam chhunga zo ngei tura hrilhin, hnathawktu (labour) leh khawl tam zawk dah belh turin a hriattir nghal a. Aizawl khawpui zauh belh tumna atana ruahmanna te tihlawhtlin leh khawpui chhung traffic tawt lutuk tihzangkhaina kawngah he project hian pawimawhna bik a neih avangin Aizawl khawpui atanga B-ypass Road thlenga kal theihna (approach road) dang siam belh chu State Fund atanga tih a ngaih tur thu a sawi bawk.
PWD hotute chuan by-pass road laih mek hian Lengpui Airport, Sairang Railway Station, Industrial Growth Centre Luangmual, Zoram Medical College & Hospital leh Mizoram chhim lam tan inkalpawhna tha leh awlsam a thlen dawn tih sawiin, Mizorama khualzinte tlawh hlawh ber pakhat Reiek khaw kalkawng a pawh dawn avangin tourism lamah hmasawnna nasa zawk a thlen theih dawn thu leh kawngpui tha chuan kuthnathawktute tharchhuah phurhna a ti ziaawm tur thu te an sawi bawk.
Construction of Aizawl By-pass on Western Side under PM-DeVINE Scheme atan hian February ni 10, 2024 khan cheng vbc. 500 sanction a ni a, Contractor atan RG Buildwell Engineers Pvt. Ltd. thlan niin January ni 16, 2026 khan hna thawk tan tura hriattirna chhuah a ni a. Kawng hi kilometer 45 laih tur a ni a, Sairang Sihhmui atanga intanin Muallungthu-ah a chhuak ang. Tun dinhmun ah 33.61% laih tawh a ni a, January ni 16, 2028 a lai tlang fel tura tih an ni.