Aizawl-ah 'North East Bankers’ Conclave 3.0' neih a ni
'North East Bankers' Conclave 3.0' hi Union Minister of Development of North Eastern Region (DoNER) Jyotiraditya M. Scindia chuan hmanpuiin North East State-te chu thalai hnathawk thei rual tamna, lehkha thiam, ziak leh chhiar thiam tamna a nih bakah ram leilung hausakna thahnem tak awmna a nih thu a sawi a. Kum 2 leh thla 8 DoNER Minister a nih chhung hian tun tum hi India hmarchhak State vawi 35 a tlawhna a nih thu leh India hmarchhak State tih hmasawn nan hian Bank leh sawrkar thawhhona a pawimawh thu a sawi a. Agartala-a North East Bankers’ Conclave 2.0 buatsaih tuma hmachhawp hrang hrang zingah Bank Branch thar hawn belh te, ATM bun belh te, thingtlang khua Bank la awm lohna te chu Bank nena thlunzawm te a tel thu a sawi a. Heng hmachhawp bawhzuina kawngah hian December 2024 leh March 2026 inkar khan Bank Branch thar 131 hawn belh a nih thu te, ATM 126 bun belh a nih thu te leh Bank leh Postal service nena thlunzawm tura khaw 9479 chhinchhiah atangin khaw 6905 chu thlunzawm a nih tawh thu a sawi a ni.
Heng bakah hian mi tam zawkin Banking Service tangkai taka an chhawr theih nan mi 3000 tal chenna khuaah chauh Brick-and-mortar Branch din tura inkaihhruaina awmsa chu North East State tan mi 2000 chin chenna khuaah tihhniam a nih thu a sawi a. India hmarchhak State-a Non-Branch transactions zinga za zela 90.2 chu Unified Payments Interface (UPI) kaltlang a nih thu a sawi. Heng hmasawnna duhawm tak tak a thlen rual hian Bank emaw, Postal service emaw nena la thlunzawm loh khaw 2574 la awm chu thlunzawm thuai a nih theih nan nasa zawka tan lak a tul thu a sawi a ni.
DoNER Minister chuan Bank-te Credit-Deposit Ratio tih sanna tur target siam a nih thu pawh sawiin, Tripura tan 47% atangin 60% ah, Arunachal tan 60%, Mizoram tan 67% a ni tih a sawi a, CD Ratio tihsan chu, State chhunga sum lengvak tihpun a, State tih hmasawnna hmanraw pawimawh tak a nih thu a sawi bawk.
North East Bankers’ Conclave 3.0-ah hian NEDFi Chairman & Managing Director, PVSLN Murty chuan Conclave thupui sawi hawngin Ministry of DoNER Secretary Katikithala Srinivas chuan kalkhawmte lawmna thu a sawi a, Manoj Muttathil Ayyappan, Joint Secretary, DFS chuan Power Point Presentation hmangin NE Bankers’ Conclave 2.0 thurel bawhzuina hrang hrang a tarlang bawk a. Chawhnu khan Break Out Session pali, Brain Storming Discussion leh Valedictory Session-te neih a ni.
He Conclave hi tlai lamah a kharna hun hmangin Union Minister of State for DoNER Dr. Sukanta Majumdar chuan a hmanpui a, North-East India tihhmasawn chu Sawrkar Laipuiin a ngaih pawimawh thu sawiin, Ministry of DoNER chuan Prime Minister's Development Initiative for North East Region (PM-DevINE), North East Special Infrastructure Development Scheme (NESIDS) leh North Eastern Council (NEC) atangin North-East State-te tan project hrang hrang a siam thin thu a sawi a. Mizoram tan pawhin September ni 30,2026 thleng khan heng scheme atangte hian cheng vbc. 1340 hu project siam a nih tawh thu a sawi bawk a ni.