AH&Vety Minister in Thenzawl-a Ar vulhna tur hmun a tlawh
AH &Vety Minister hian nimin khan Thenzawl-a AH&Vety hmunhma tlawhin Mega Egg Project sak mek bakah ranchaw chinna hmun a neih Dilpui leh ranchaw chinna hmun zauhna tur kawng Lei dawh hna kal mek a tlawh a. AH & Vety Department chuan Serchhip District chhunga Vety Farm Complex, Thenzawl-ah hian Artui tharchhuahna Farm lian din turin hma a la mek a. He project atan hian NABARD RIDF-XXX hnuaiah cheng vbc. 20.64 ruahman niin Ar tui tam chi (Poultry Layer) nuai khat vulh theihna tura duan a ni a. AH&Vety Minister chuan a tlangpuiin Mizoram chhunga Artui tharchhuah hi kum khatah nuai 397 vel a nih thu leh mi pakhat tan kum khatah Artui 29 chauh a daih a nih thu a sawi a, “Vairengte kaltlangin nitin Artui 70,000 vel ram chhungah kan lalut a, heng atanga Artui-a kan senral hi kum khatah cheng vbc. 16 chuang a ni,” a ti a. “Tuna Mega Egg project kalpui mek hi kan tihlawhtling thei a nih chuan kan State mamawh tam tak kan phuhru thei dawn a, he Farm hi a nihna ang taka kan kalpui thei a nih chuan ni khatah artui 70,000 atanga 89,000 vel tharchhuah theih kan beisei,” tiin an hmalakna te a sawifiah a ni.